Ǵylymdaǵy mol baılyqqa qol jetkizý úshin latyn álipbıin meńgerý qajet - Sabyrjan Muhtarov
AQTÓBE. QazAqparat - Latyn álipbıine kóshý bir kúnde qabyldanǵan sheshim emes. Qoǵam, memleket, halyqtyń daıyndyǵy bar. Biz bilim, ǵylymdaǵy mol baılyqqa qol jetkizý úshin latyn grafıkasyn meńgerýimiz kerek. Bul týraly Qudaıbergen Jubanov atyndaǵy Aqtóbe óńirlik memlekettik ýnıversıteti, kásibı shyǵarmashylyq fakýltetiniń dekany Sabyrjan Muhtar aıtty, dep habarlaıdy QazAqparat tilshisi.
«Latyn álipbıine kóshý bir kúnde qabyldanǵan sheshim emes. Elbasy Nursultan Nazarbaev 2012 jylǵy halyqqa arnaǵan Joldaýynda bul týraly aıtyp, sodan beri qoǵam qaıratkerleri men belsendiler, ǵalymdar men zertteýshiler túrli jıyn, kezdesýler ótkizdi. Qoǵamdyq talqylaýlar júrdi. Áli de pikirtalas bolyp jatyr. Bir anyǵy - latyn álipbıine kóshý mol baılyqtyń kilti. Nege? Óıtkeni álemdik aqparattyń negizi latyn grafıkasynda bolyp otyr. Bul elimizdiń damýyna, alǵa basýyna kepildik beretin qadam»,- dedi Qudaıbergen Jubanov atyndaǵy Aqtóbe óńirlik memlekettik ýnıversıteti, kásibı shyǵarmashylyq fakýltetiniń dekany Sabyrjan Muhtar.
Latyn álipbıine kóshý kezinde túrli qıyndyqtar men kedergiler kezigedi. Bizdegi mindet - alǵa umtylý, bar qıyndyqty jeńý.
«Kez kelgen bastamanyń óz problemasy bar. Máselen, úı salý qajet. Ony salý úshin de irgetasyn quıyp, qabyrǵasyn qalaý kúsh, jigerdi talap etedi. Biz qıyndyqtan qashpaı, jeńýdi úırenýimiz kerek. Bári óz qolymyzda. Latyn álipbıine kóshý - qajettilik, damýymyzdyń kepili. Tarıhqa kelsek, 1928 jyldan 1940 jylǵa deıin latyn álipbıin paıdalandyq. Demek bul qazaq halqynyń birinshi ret qolǵa alǵan isi emes. Sonymen qatar, qazirgi kezde halyqtyń latyn áripbıine kóshýge daıyndyǵy bar. Minip júrgen kólik, taǵyp júrgen saǵat, túrli turmystyq tehnıka, kompıýterlerdiń bárinde latyn grafıkasymen jazylǵan tańbalar bar. Sol arqyly búkil halyqtyń kózi úırendi. Belgili bir dárejede halyqtyń saýaty ashylyp, áripterdi tanydy. Ásirese, aǵylshyn tilin oqyp júrgen jastardyń múmkindigi mol. Qoǵamnyń, memlekettik, halyqtyń daıyndyǵy bar, alda úlken jumysty birge atqaramyz»,- dedi fılologııa ǵylymdarynyń kandıdaty, dotsent Sabyrjan Muhtarov.
