Ǵylymda ınvestorlar men venchýrlik qorlardyń áriptestigin jolǵa qoıý kerek - «Parasat» holdıngi
ASTANA. 21 qańtar. QazAqparat - Ǵylymda ınvestorlar men venchýrlik qorlardyń áriptestigin jolǵa qoıý kerek.
Bul týraly búgin Ortalyq kommýnıkatsııalar qyzmetinde Qazaqstannyń Ulttyq jaratylystaný ǵylymdary akademııasynyń birinshi vıtse-prezıdenti jáne «Parasat» Ulttyq ǵylymı-tehnologııalyq holdınginiń ǵylymı konsýltanty Nuraly Bekturǵanov málim etti.
Aıta keteıik, Memleket basshysy ǵylymǵa ınvestorlardy tartý úshin elde venchýrlik kapıtal qurý kerektigin aıtqan bolatyn. N.Bekturǵanovtyń habarlaýynsha, osyǵan oraı, «Parasat» holdıngi venchýrlik qor qurǵan.
«Ǵylymdy venchýrlik qor, memleket jáne jeke menshik kásiporyndar birdeı qarjylandyrady jáne táýekelderdi teńdeı bóletin bolady. Qarajatyn táýekelge tikken kez kelgen ınvestor oqys jaǵdaılardan saqtandyrylýy kerek», - dedi N.Bekturǵanov.
