Ǵylym salasynda maman jetispeıdi jáne jalaqy da tómen: másele Senatta talqylandy

ASTANA. QazAqparat – Ǵylym salasynda maman jetispeıdi jáne jalaqy da tómen. Senattyń Áleýmettik-mádenı damý jáne ǵylym komıtetiniń depýtattary Ǵylym jáne joǵary bilim mınıstrligi basshylyǵymen, sondaı-aq ǵalymdar jáne sarapshylarmen ǵylymdy qoldaý sharalaryn talqylady. Bul týraly QazAqparat Palatanyń baspasóz qyzmetine silteme jasap habarlaıdy.

Kezdesý ǵylym salasynyń jaı-kúıi, problemalary, keleshegi jáne quqyqtyq retteý máselelerine arnaldy.

«Búgingi sharamyzdyń negizgi maqsaty – elimiz Prezıdentiniń ótken jylǵy qyrkúıektegi Joldaýynda berilgen tapsyrmalardyń iske asý barysy týraly aqparatty jáne VIII saılanǵan Parlamenttiń birinshi sessııasynyń ashylýynda sóılegen sózindegi qoıylǵan tapsyrmalardy oryndaý jónindegi josparlardy tyńdaý. Sonymen qatar, ǵylymdy basqarý júıesin jańǵyrtý, ǵylymı áleýettiń sapasyn arttyrý, ǵylymnyń nátıjesin ekonomıkaǵa engizýge qatysty máselelerdi pysyqtaý da kún tártibinde tur», - dedi Nurtóre Júsip.

Senatorlar men ǵalymdar ǵylymı mamandardyń jetispeıtini jáne jalaqysynyń tómendigi týraly máselelerdi kóterdi. Sondaı-aq, Qazaqstannyń jahandyq ınnovatsııalyq reıtıngide artta qalýy men elimizdegi ınnovatsııalyq óndiris úlesiniń tómendigi de atalyp ótti.

Ǵylym jáne joǵary bilim mınıstrliginiń aqparaty boıynsha, Memleket basshysynyń tapsyrmasyna sáıkes, ǵylymı jáne saraptamalyq qoǵamdastyqtyń atsalysýymen ulttyq deńgeıdegi qoldanbaly máselelerdi sheshýge ǵylymdy tartý úshin ǵylymdy damytýdyń 2025-2026 jyldarǵa arnalǵan baǵdarlamalyq qujattary ázirlengen. Bul qujattar salanyń kadrlyq áleýetin nyǵaıtýǵa, ǵylymı qyzmetkerler sanyn 1,5 esege kóbeıtýge, ǵylymı ekojúıeniń básekege qabilettiligin arttyrýǵa, sondaı-aq Qazaqstan Respýblıkasynyń damý basymdyqtaryna sáıkes salalardyń negizgi ǵylymı-tehnıkalyq mindetterdi qalyptastyrý tetikterin engizýge baǵyttalǵan.

Senatorlar osy sharaǵa daıyndyq aıasynda birqatar kóshpeli kezdesý ótkizdi jáne onda barlyq múddeli taraptardy tyńdaı otyryp, jergilikti jerlerdegi ózekti máselelerdi egjeı-tegjeıli zerdeledi. Ǵylym qoryndaǵy kezdesý barysynda ǵylym salasyn damytýǵa zań shyǵarý isinde qoldaý kórsetýge, nyǵaıtýǵa úles qosýǵa, onyń ishinde salalyq mınıstrlikpen jáne basqa da uıymdarmen ózara is-qımyl jasaýǵa senatorlardyń daıyn ekendigi aıtyldy.

Qatysýshylar kezdesý nátıjesi boıynsha osy baǵyttaǵy birlesken jumys jalǵasatynyn atap ótti.