Ǵylym salasynda eńbek etip júrgen jandardy qoldaımyn - Prezıdent
Prezıdentpen kezdesý barysynda Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń professory Sársenbek Montaev otandyq ǵylymnyń jetistikteri týraly aıtty.
«Qazirgi tańda memleketimiz ǵalymdarǵa, ásirese jas ǵalymdarǵa keń kólemde qoldaý kórsetip jatyr. Sonyń nátıjesinde meniń jetekshiligimmen 10 ınnovatsııalyq joba júzege asyrylýda. Onyń ekeýi tolyǵymen kommertsııalandyryldy. Qalǵandarynyń zertteýleri tolyq aıaqtalyp, qazir óndiriske engizýge daıyn. Ǵylymı jobalarymyzdyń jańashyldyǵy 15 ınnovatsııalyq patentpen qorǵaldy jáne ǵylymı nátıjelerimiz Web of Science Scopus bazasyna kiretin shet memleketterdegi ındeksatsııasy joǵary jýrnaldarda jarııalandy. Sonyń nátıjesinde AQSh-ta Stenford ýnıversıtetiniń sarapshylary daıyndaǵan álemdegi eń bedeldi ǵalymdardyń World Ranking of Top 2% Scientists reıtıngine kirdim. Bul bizdiń ǵalymdardyń zertteýleriniń ınnovatsııalyq deńgeıin sheteldik ǵalymdarynyń moıyndaǵany, baǵalaǵany dep esepteımin. Aldaǵy ýaqytta da Qazaqstannyń ǵylymı áleýetin álemdik deńgeıge kóterýge jáne ǵylymı jobalardyń túpki nátıjeleriniń el ekonomıkasyna jumys isteýine úles qosamyz dep senim bildiremin», - dedi ǵalym.
Osy oraıda Memleket basshysy jas ǵalymdardy qoldaıtynyn, Jas ǵalymdar keńesi qurylǵanyn atap ótti.
«Jas ǵalymdardy jumysqa shaqyramyz. Óte kerek nárse. Jalpy, ózim ǵylym degendi jaqsy kóremin. Ǵylym salasynda jumys istep júrgen adamdardy qoldaımyn. Jas ǵalymdardy da qoldaı beremin. Bul elimiz úshin, Qazaqstan úshin kerek nárse», - dedi Qasym-Jomart Toqaev.
