Ǵylym salasyna uzaq ýaqyt nazar aýdarylmaı keldi, osy olqylyqtyń ornyn toltyrý qajet - Prezıdent
Bul týraly búgin Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń birinshi otyrysynda sóılegen sózinde aıtty, dep habarlaıdy QazAqparat.
«Shyn máninde, búgingi basqosýdyń mán-mańyzy zor. Qaı zamandy alyp qarasaq ta, damýdyń basty kilti bul – ǵylym. Adamzat tarıhyndaǵy jetistiktiń barlyǵy – bilimniń jemisi. Ásirese qazirgi ozyq tehnologııa dáýirinde ǵylymsyz alǵa basý múmkin emes. Sondyqtan men ǵylymdy damytý isine aıryqsha mán berip otyrmyn.
Osy ózekti másele boıynsha saılaý aldyndaǵy baǵdarlamada arnaıy óz pikirimdi aıttym. Sebebi ǵylymdy damytý – memleket saıasatyndaǵy eń mańyzdy baǵyttyń biri.
Ókinishke qaraı, elimizde uzaq jyl boıy oǵan basa nazar aýdarylǵan joq. Soǵan baılanysty sheshimin tappaı jatqan máseleler az emes. Tipti, bul sala artta qaldy deýge bolady. Biz órkenıetti el bolamyz desek, osy olqylyqtyń ornyn toltyrýymyz kerek. Sol sebepti meniń Jarlyǵymmen Ǵylym jáne tehnologııalar jónindegi ulttyq keńes quryldy. Oǵan Prezıdent janyndaǵy keńes mártebesi berildi. Bul – memlekettiń ǵylym salasyndaǵy basymdyqtaryna qatysty usynym ázirleıtin negizgi qurylym»,-dedi Prezıdent.
Sondaı-aq Memleket basshysy keńesti jasaqtaǵan kezde onyń quramyna aıryqsha mán berilgendigin atap ótti.
«Qazaq ǵylymyna zor eńbek sińirgen aǵa býyn ókilderin jáne shetel ǵalymdaryn shaqyrdyq. Álemge áıgili ǵylymı ortalyqtarda jumys istep júrgen jas ǵalymdarymyz da keńestiń quramyna qosyldy.
Bizge aldyńǵy tolqynnyń mol tájirıbesi, keıingi tolqynnyń ozyq bilimi jáne tyń ıdeıalary asa qajet. Olar ózara úılesim taýyp, elimizdiń kádesine jaraıdy dep senemin»,-dedi Prezıdent.
