Ǵylym salasyn jetildirý maqsatynda birneshe zańǵa ózgerister engiziledi
ASTANA. Naýryzdyń 29-y. QazAqparat - Úkimet «Qazaqstan Respýblıkasynyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn Májilistiń qaraýyna usyndy. Bul zań jobasynyń qajettiligi «Ǵylym týraly» Zańnyń jańa redaktsııasynyń ázirlenýine baılanysty bolyp otyr,
dep habarlaıdy QazAqparat.
«Normatıvtik quqyqtyq aktiler týraly» zańnyń babyna sáıkes jańa zań qabyldaý qoldanystaǵy zańdarǵa ózgerister nemese tolyqtyrýlar engizýdi talap etetin jaǵdaıda jańa zańnyń jobasymen birge Qazaqstannyń basqa zańdaryna túzetýler engizýdi kózdeıtin ilespe zańnyń jobasy ázirlenip, engiziledi.
Azamattyq kodekske tolyqtyrý engizý memlekettik uıymdardyń menshik ıesiniń kelisiminsiz tek zııatkerlik menshiktiń jarǵylyq kapıtalyna enetin kásiporyndar qurý múmkindigin qarastyrady. Osy shara ǵalymdardy yntalandyrý úshin jaǵdaı jasaýǵa, olardyń ázirlemelerin engizýge jáne ekonomıkanyń naqty (jeke menshik) sektoryn ǵylymdy qajet etetin óndiristerge tartýǵa múmkindik beredi.
Bıýdjet kodeksine tolyqtyrý engizý ǵylymı jáne ǵylymı-tehnıkalyq baǵdarlamalar men jobalardy iske asyrýdyń barlyq merzimine mámilelerdi tirkeý qajettiligine negizdeledi.
Zań jobasyna sáıkes ǵylym salasyndaǵy ýákiletti organ akkredıttegen ǵylymı, ǵylymı-tehnıkalyq qyzmet sýbektileri salyq salýǵa jatpaıdy.
Memlekettik ǵylymı uıymdar, memlekettik joǵary oqý oryndary, onyń ishinde ózge de tulǵalarmen birlesip, qyzmeti ǵylymı, ǵylymı-tehnıkalyq qyzmettiń nátıjelerin praktıkada qoldaný (kommertsııalandyrý) bolatyn uıym qurýǵa quqyly. Osyǵan baılanysty «Memlekettik kásiporyndar týraly» Zańǵa tolyqtyrýlar engizý talap etiledi.
Ýákiletti organ ǵylymı zertteýlerdi jáne ǵylymı uıymdar ótkizetin taýarlar men qyzmetterdi memlekettik satyp alýdy ótkizýge arnalǵan konkýrstardy uıymdastyrýdy «Memlekettik satyp alý týraly» Zańnyń jetkizýshini tańdaýdy jáne onymen memlekettik satyp alý týraly shart jasasýdy reglamentteıtin normalaryn qoldanbaı júzege asyrýy qajet. Bul «Memlekettik satyp alý týraly» Zańǵa ózgerister engizýdi kózdeıdi.
Zań jobasynda memlekettik ǵylymı uıymdardyń, olarǵa teńestirilgen ǵylymı uıymdardyń, memlekettik joǵary oqý oryndarynyń, daýys beretin aktsııalarynyń (úlesiniń) elý jáne odan da kóp paıyzy memleketke tıesili joǵary oqý oryndarynyń, sondaı-aq daýys beretin aktsııalarynyń (úlesiniń) elý jáne odan da kóp paıyzy memleketke tıesili zańdy tulǵalarǵa daýys beretin aktsııalarynyń (úlesiniń) elý jáne odan da kóp paıyzy tikeleı nemese janama tıesili joǵary oqý oryndarynyń qyzmetkerlerin turǵyn úımen qamtamasyz etý múmkindigi kózdeledi. Osyǵan baılanysty «Qazaqstan Respýblıkasyndaǵy turǵyn úı qurylysy jınaq aqshasy týraly» Zańǵa tıisti tolyqtyrýlar engizý talap etiledi.
Zań jobasyn iske asyrý respýblıkalyq bıýdjetten qosymsha qarjy bólýdi talap etpeıdi jáne keleńsiz áleýmettik-ekonomıkalyq saldarǵa ákep soqpaıdy.
