Ǵylym salasyn damytý úshin jańa zańnyń qabyldanýy óte mańyzdy
ASTANA. Sáýirdiń 12-si. QazAqparat - Búgin Májiliste «Ǵylym týraly» zań jobasynyń tujyrymdamalyq tanystyrylymy ótti. Bul sharany Májilistiń Áleýmettik-mádenı damý komıteti uıymdastyrdy,
dep habarlaıdy QazAqparat.
Májilistiń Áleýmettik-mádenı damý komıtetiniń tóraıymy Dınar Nóketaeva kirispe sóz sóılep, ǵylym salasyn damytý úshin jańa zańnyń qabyldanýy óte mańyzdy ekenin aıtyp ótti.
Zań jobasynyń maqsaty týraly QR Bilim jáne ǵylym mınıstriniń orynbasary Mahmetǵalı Sarybekov túsinik berip, depýtattardyń suraqtaryna jaýap berdi.
Aıta ketý kerek, bul zań jobasy Memleket basshysynyń tapsyrmalaryn oryndaý maqsatynda ázirlengen. Osy zańnamalyq akti ǵylymdy basqarý jáne ǵylymı jáne ǵylymı-tehnıkalyq qyzmetti uıymdastyrý prıntsıpterin jetildirý maqsatynda daıyndalǵan.
Jańa «Ǵylym týraly» zań jobasynyń normalary ǵylym salasyn odan ári damytýǵa baǵyttalǵan aktini bildiredi ári onyń ǵylymı jáne ǵylymı-tehnıkalyq qyzmettiń barlyq sýbektileriniń teń quqylylyǵy prıntsıpteri saqtalatyn negizdemelik sıpaty bar.
Zań jobasyn iske asyrý transfert, eldi damytýdyń basym baǵyttary boıynsha jańa bilimdi qurý jáne taratý arqyly Qazaqstan ekonomıkasynyń básekege qabilettiligin kóterýge yqpal etetin ulttyq ınnovatsııalyq júıeni qurýǵa jol ashpaq.
Zań jobasyna baılanysty Ramazan Sárpekov, Vladımır Nehoroshev, Sát Toqpaqbaev, Ermuhanbet Omarov, Aldan Smaıyl, Rozaqul Halmuradov, Raısa Polışýk, Nurlan Ónerbaı, Vıktor Kııanskıı jáne basqa depýtattar suraq qoıyp, usynystaryn aıtty.
