Ǵylym mınıstri Nazarbaev Ýnıversıtetin basqarý júıesine qatysty pikir bildirdi

ASTANA. QazAqparat – Nazarbaev Ýnıversıtetine qatysty zańnamaǵa tıisti ózgeris engizý Úkimet deńgeıinde pysyqtalyp jatyr. Bul týraly Májiliste ǵylymdy damytý taqyrybyndaǵy Úkimet saǵatynnan keıin QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Nazarbaev Ýnıversıteti shyn máninde bizdiń jetekshi zertteý ýnıversıtetterimizdiń biri. Munda aýqymdy zertteý ári zerthanalyq baza bar. Ǵylymı jarııalanymdar boıynsha óte jaqsy kórsetkishter baıqaldy. Nazarbaev Ýnıversıtetiniń túlekteri qazir mańyzdy kompanııalarda jumysqa ornalasyp jatyr. Degenmen, aıtylyp jatqan synnyń basym bóligi jumsalǵan qarajattyń ashyq tártipte ıgerilýine, halyqaralyq reıtıngilerge enýine qatysty bolyp otyr», - dedi S. Nurbek Májiliste ǵylymdy damytý taqyrybyndaǵy Úkimet saǵatynan keıin tilshiler suraǵyna jaýap bere otyryp.

Onyń aıtýynsha, qazirgi kezde mınıstrlik tikeleı Nazarbaev Ýnıversıtetine yqpal ete almaıdy.

«Onyń qyzmeti bólek zańmen rettelip otyr. Sondyqtan zańnamaǵa tıisti ózgeris engizý Úkimet deńgeıinde pysyqtalyp jatyr. Osy baǵytta atalǵan ýnıversıtet boıynsha tıisti vedomstvonyń basqarýyna qatysty jáne oqý ornynyń esep berýi máselesi qarastyrylǵan. Ázirge biz ýnıversıtetti memlekettik bilim berý tapsyrystary arqyly ǵana qoldap kelemiz. Atap aıtqanda, jurtshylyqty bul máselege óte muqııat qaraýǵa shaqyramyn. Óıtkeni bul ýnıversıtetke qanshama kúsh-jiger, resýrs jumsalǵanyn eskere otyryp, joǵary oqý ornynyń áleýetin joıyp almaý mańyzdy», - dedi mınıstr.

Sonymen qatar depýtat Ashat Aımaǵambetov eldiń damýy úshin atalǵan ýnıversıtet pen Nazarbaev Zııatkerlik mektepteri kerek ekenin aıtty. Osy oraıda atalǵan oqý oryndaryn basqarý júıesinde barlyǵy túsinikti ári ashyq bolýy kerek.

Budan buryn habarlanǵandaı, búgin týraly Májiliste ǵylymdy damytý taqyrybyndaǵy Úkimet saǵatynda QR Ǵylym jáne joǵary bilim mınıstri Saıasat Nurbek jastar PhD ǵylym dárejesin alyp, ýnıversıtetke jumys isteýge barmaıtynyn aıtty.