Ǵylym men tehnıka salasyndaǵy QR Memlekettik syılyǵyna 2013 jyly 19 jumys tústi

ASTANA. 10 qazan. QazAqparat - Aqordada Qazaqstan Respýblıkasynyń Memlekettik hatshysy M.Tájınniń tóraǵalyǵymen 2013 jylǵy Ǵylym jáne tehnıka salasyndaǵy memlekettik syılyqty berý jónindegi komıssııanyń qorytyndy otyrysy ótti, dep habarlady Aqordanyń baspasóz qyzmeti.

Bul syılyq ǵylym jáne tehnıka qaıratkerleriniń eńbegin qoǵam men memleket aldynda joǵary baǵalaý bolyp tabylady. Ony Memleket basshysy Qazaqstan Respýblıkasy azamattaryna mynadaı jetistikteri úshin beredi: - respýblıkanyń ekonomıkalyq jáne áleýmettik damýyn aıtarlyqtaı jedeldetýge, Qazaqstannyń ǵylymy men tehnıkasynyń álemdegi ozyq jetistikter deńgeıine shyǵýyna ákeletin irgeli jáne qoldanbaly zertteýler salasyndaǵy asa úzdik nátıjeleri úshin; - bir saladaǵy qoǵamǵa keńinen tanylǵan ǵylymı jańalyqtar, monografııalar men ǵylymı jumystary úshin; - tehnıkanyń, materıaldar men tehnologııalardyń álemdik balamalary nemese odan joǵary deńgeıdegi jańa túrlerin ázirlegeni jáne óndirýdi uıymdastyrǵany úshin. Ǵylym men tehnıka salasyndaǵy Qazaqstan Respýblıkasynyń memlekettik syılyǵyna 2013 jyly barlyǵy 19 jumys tústi. Memlekettik ǵylymı-tehnıkalyq saraptama jáne saraptamalyq-taldamalyq baǵalaý qorytyndysy jónindegi komıssııanyń osynyń aldyndaǵy otyrysynda (bıylǵy 12 maýsym) jumystar budan ári konkýrsqa qatysý úshin irikteldi. Atalǵan jumystar jónindegi málimetter keńinen qoǵamdyq talqylaýdan ótý úshin BAQ-ta jarııalandy. Talqylaý kezinde 300-ge jýyq pikir (retsenzııalar, hattar, basylymdaǵy jarııalanymdar), sonyń ishinde shetel ǵalymdarynan 116 pikir kelip tústi. Usynylǵan pikirler men retsenzııalardy eskere kelip, konkýrstyq jumystar sektsııalyq sarapshylar otyrystarynda qaraldy. Komıssııanyń qorytyndy otyrysynda Memleket basshysynyń qaraýyna usynylatyn 3 jumys bekitildi. Memlekettik syılyq laýreattaryna marapattar dástúrli túrde Táýelsizdik kúni tapsyrylady.