Ǵylym memlekettik qoldaýǵa muqtaj – vıtse-premer

ASTANA. QazAqparat – Ǵylym memlekettik qoldaýǵa muqtaj. Bul týraly QR Premer-Mınıstriniń orynbasary Altaı Kólginov aıtty, dep habarlaıdy QazAqparat tilshisi.

«Bizdiń ǵylymı qoǵamdastyq, joǵary oqý oryndarynyń, ýnıversıtetterdiń rektorlary aýqymdy jumys istep jatyr. Búgin sheshilýi tıis josparlardy talqyladyq. Bul – tsıfrlandyrý, pedagogtarymyzdyń biliktiligin arttyrý, bolashaqqa kadrlyq qajettilikti durys josparlaý, bizge qajetti jańa mamandyqtar máselesi», - dedi Úkimet basshysynyń orynbasary QR Ǵylym jáne joǵary bilim mınıstrliginiń keńeıtilgen alqa májilisinde.

Onyń atap ótýinshe, alda kóp jumys kútip tur.

«Básekege tótep berý úshin bizge óte kóp jumys isteý qajet. Eń bastysy ǵylymı zertteýler is júzinde qoldanysqa ıe bolýy kerek. Osyǵan jaǵdaı jasaýǵa tıispiz. Memleket basshysynyń naqty tapsyrmalary ǵylymdy damytýǵa baǵyttalǵan. Ǵylym memlekettik qoldaýǵa muqtaj», - dedi Altaı Kólginov.