Ǵylym qyzmetkeri kúni qarsańynda Túrki Akademııasynda bir top ǵalymdar bas qosty
ASTANA. QazAqparat - Búgin Túrki akademııasynda ǵylym qyzmetkerleri kúni qarsańynda elimizdiń bir top belgili ǵalymdary jáne qoǵam qaıratkerleri bas qosty. Bul týraly Túrki Akademııasynyń baspasóz qyzmeti habarlady.
Dóńgelek ústel basynda M.Joldasbekov, Q.Sultanov, O.Smaǵulov, S.Qasqabasov, N.Orazalın, Z.Samashev, Q.Salǵara, Á.Ahmetov, A.Smaıyl, B.Aıaǵan, Ǵ.Esim syndy zııalylar men sala bilgirleri jalpy túrkitanýdyń búgini men erteńine qatysty oılaryn ortaǵa saldy. Túrki akademııasynyń jumystarymen jaqyn tanysyp, oń baǵalap, tabys tiledi. Akademııanyń halyqaralyq mártebe alý baǵytyndaǵy jumystary men mártebe alǵan soń atqaratyn jumys, jobalary týraly suraqtaryna tolymdy jaýap aldy. Sondaı-aq, bıyl 75 jasqa tolyp otyrǵan belgili tarıhshy, professor Qoıshyǵara Salǵarauly túbi bir túrki halyqtarynyń rýhanı-mádenı muralaryn zertteý, nasıhattaý jáne túrkologııa ǵylymyn damytý jolyndaǵy kóp jylǵy eńbegi úshin Túrki akademııasynyń qurmet gramotasymen marapattaldy.
