«Ǵylym qory» tolyqqandy jumys isteýi úshin 200 mlrd teńge bólý qajet – senator
NUR-SULTAN. QazAqparat – «Ǵylym qory» tolyqqandy jumys isteý úshin 200 mlrd teńge bólý qajet. Bul týraly búgin QR Parlamenti Senatynyń depýtaty Baqytjan Jumaǵaulov aıtty, dep habarlaıdy QazAqparat tilshisi.
«Búkil álemde tehnologııalardy kommertsııalandyrýǵa memleket barynsha az qarjy salady. Degenmen, Qazaqstan bıznesiniń áli aıaǵynan nyq turmaǵandyǵyn eskersek, eldegi qarjylandyrý mardymsyz ekendigi túsinikti. Sondyqtan memlekettiń kommertsııalandyrýdy qoldaý sharalary taıaý 5-10 jyl ishinde baıypty ári eleýli bolýy tıis. Oljas Qudaıbergenovtyń Ǵylym qoryna jer qoınaýyn paıdalanýshylardyń 1 paıyzyn tartý jospary bar. Bul óte jaqsy. Ǵylym qoryn qarjylandyrýdy tolyqtaı qarastyrý qajet. Aryn Orsarıevke (Ǵylym qorynyń tóraǵasy) keminde 200 mlrd teńge bólý qajetti týraly keńes bergim keledi. Sonda ǵana qor tolyqqandy jumys isteıdi. Bul aktsıonerlik qoǵam jáne jarǵylyq qoryn barlyq ýaqytta tolyqtyrýǵa bolady», - dedi senator elordada ótip jatqan tehnologııalardy komertsııalandyrý jónindegi forýmda.
Sonymen qatar ol otandyq ǵylymnyń damýyna bólinetin qarjynyń mardymsyz bolýy kedergi keltirip otyrǵandyǵyn aıtty.
«Bıyl QR Úkimeti janyndaǵy Joǵary ǵylymı-tehnıkalyq komıssııanyń otyrysynda maqsatty qarjylandyrý baǵdarlamasyn 65 paıyzǵa ulǵaıtty. Bul jaqsy kórsetkish. Granttyq qarjylandyrý 115 paıyzǵa, ıaǵnı 2 eseden astamǵa arttyryldy. Al tehnologııalardy kommertsııalandyrý 5,4 mlrd teńge deıinde qalýy ókinishti-aq. Bul jerde túsinbestik bolǵan sııaqty. Munda qordyń da kinási bar. 38 mlrd teńgeden astam qarajatqa 153 joba júzege asyrylyp jatyr. Ǵylym qory jumys istegen 5 jyldyń ishinde bıznestiń teń qarjylandyrýy 14,5 paıyz, shamamen 5 mlrd teńge boldy», - dedi B.Jumaǵulov.
