Ǵylym komıteti grant alatyn ǵalymdar úshin esep berý rásimin jeńildetti
Ǵylymı-zertteý uıymy endi qujattardy, oryndalǵan jumystar aktilerin, qarjylyq esepterdi, kelisimshart jobalaryn jáne basqa da materıaldardy elektrondy poshta arqyly jibere alady.
«Bul ǵalymdardy qajetsiz jumystan barynsha aryltý úshin jasalyp otyr, - deıdi QR BǴM Ǵylym komıteti tóraǵasynyń mindetin atqarýshy Erkin Sadyqov. - Bizge qujattardy elektrondy poshta arqyly jiberýdiń arqasynda ǵalymdar komıtetke ózderi baryp, áýre bolmaıdy».
Qabyldanǵan sharanyń paıdasy mol. Atap aıtqanda, ýaqyt únemdeledi, sonymen qatar, aqparat almasý jyldamdaıdy, sapa joǵarylaıdy, tsıfrlyq tehnologııalardy belsendi qoldanatyn bolady. Buǵan qosa, qujattardy elektrondy nemese qaǵaz túrinde jiberýdi grant alýshy ózi tańdaıdy.
A.B. Bekturov atyndaǵy hımııa ǵylymdary ınstıtýtynyń bas dırektory, QR UǴA akademıgi Edil Erǵojınniń aıtýynsha, Ǵylym komıtetiniń qujattardy elektrondy nusqada qabyldaýy óte durys sheshim. Mundaı shara ǵalymdardy, grant alýshylardy jáne qujat tapsyrýǵa jaýapty basqa da tulǵalardy uzyn-sonar kezekten aryltyp, qujattarǵa jedel túrde qajetti ózgerister engizýge múmkindik beredi.
«Elbasy óziniń baıandamalarynda memlekettik qyzmetkerler men ǵalymdardy ІT-salada aldyńǵy qatarly tehnologııalardy qoldanýǵa shaqyryp, aqparattyq tehnologııalar jetistigine basa nazar aýdarady. Qujattardy elektrondy túrde qabyldaý sheneýnik pen ǵalym arasyndaǵy qarym-qatynastyń ashyqtyǵyn qamtamasyz etýi tıis. Ol óz kezeginde oń faktor bolyp tabylady. Ǵalymdar ózderiniń zertteý jumysyna ynty-shyntysymen kirisip, alańsyz eńbektenýge múmkindik alady, al bul jobalar boıynsha alynatyn nátıjelerdiń oıdaǵydaı bolýyna septigin tıgizedi. Komıtet qyzmetkerleri úshin de bul - jaqsy faktor, sebebi olar kezek kútken adamdarǵa alańdamaı, ózderiniń tikeleı qyzmettik mindetterimen aınalysady», - deıdi Edil Erǵojın.