Gvıneıadaǵy stadıonda jappaı tóbeles bolyp, ondaǵan adam qaza tapty
ASTANA. KAZINFORM – Gvıneıanyń ońtústik-shyǵysyndaǵy Nzerekor qalasynda fýtbol matchynda jankúıerler arasynda jappaı tóbeles shyǵyp, ondaǵan adam qaza tapty. Bul týraly Report agenttigi AFP-ǵa silteme jasap habarlady.
Aqparatqa sáıkes, oqıǵaǵa tóreshiniń qyzyl qaǵaz kórsetip, keıin komandalardyń birine penaltı belgilegen daýly sheshimderi sebep bolǵan, sodan keıin jankúıerler tóbelesip ketken.
Olardy ajyratý úshin polıtsııa kózden jas aǵyzatyn gaz qoldanǵan. Odan qashýǵa tyrysqan jankúıerler stadıonnan syrtqa qaraı asyǵyp, shyǵaberisterde keptelis paıda boldy. Kóbisi tunshyǵyp nemese syrtqa shyqpaq bolǵan kezde stadıon qabyrǵalarynan qulap kóz jumǵan.
Qurbandardyń dál sanyn aıtý ázirge qıyn, Máıitterdi tolyq anyqtaý jumystary júrgizilýde, delingen habarda.
– Ol jerde júzdegen óli dene bar. Keıbireýler dálizderde jáne edende jatyr. Máıithana tolyp ketti, – dedi dárigerlerdiń biri AFP agenttigine.