Gvıneıada Ebola epıdemııasy tarala bastady
NUR-SULTAN. QazAqparat – Gvıneıanyń ońtústik-shyǵysyndaǵy Nzerekore prefektýrasy men Gýeke aýdanynda Ebola epıdemııasy bastaldy, dep habarlaıdy QazAqparat Euronews agenttigine silteme jasap.
Eldiń Densaýlyq saqtaý mınıstri tóraǵalyq etken otyrys barysynda bezgektiń taralýymen kúresý úshin birqatar is-shara qabyldandy. Onda syrqattardy anyqtap, olarmen baılanysta bolǵandardyń barlyǵyn oqshaýlaý keregi aıtyldy.
Sanıtarııa qaýipsizdigi agenttiginiń basshysy Sakoba Keıttiń aıtýynsha, Ebola vırýsyn juqtyrǵan jeti oqıǵa tirkeldi. Olar – tórt er adam men úsh áıel. Úsh adam óldi. Úsheýi oqshaýlandy. Bir naýqas Kanakrıde, ekeýi Nzerekorede jatyr.
Gvıneıanyń sanıtarııa ókilderi Ebola bezgegi alǵash Gýeke qalasynda medbıkeden anyqtalǵanyn málimdedi, ol 28 qańtar kúni qaıtys boldy. Áıel birinshi aqpanda jerlendi.
«Qoshtasý rásiminen keıin birneshe kún ótken soń birneshe adamda syrqattyń belgileri baıqalǵan, ıaǵnı, ish ótý, qusý, qan ketý jáne ystyǵy kóterilý. Vırýstyń bar-joǵyn anyqtaýǵa tapsyrylǵan test nátıjesi alǵash 12 aqpanda rastaldy», - dedi Sakoba Keıt.
Dúnıejúzilik densaýlyq saqtaý uıymy Gvıneıaǵa kómek kórsetý úshin bar kúsh jumyldyratynyn málimdedi.
2014-2016 jyldary Gvıneıa Batys Afrıkadaǵy Ebola vırýsynyń taralý oshaǵyna aınaldy. Sol kezde bul óńirde indetke 28 myń adam shaldyǵyp, 11 myń adam qaıtys bolǵan edi.
