Gvıneıa-Bısaýda Konstıtýtsııaǵa ózgerister engizý jónindegi referendým ótti
ASTANA. KAZINFORM – Gvıneıa-Bısaý turǵyndary jeksenbi kúni Konstıtýtsııaǵa ózgerister engizý jónindegi referendýmǵa qatysty. Daýys berý eldegi bılik áskerılerdiń qolyna ótken áskerı tóńkeristen toǵyz aı ótken soń uıymdastyryldy, dep habarlaıdy Euronews.
Eldiń ýaqytsha bıligi negizgi zańǵa engiziletin túzetýler paketin ázirlegen. Bılik ókilderiniń málimdeýinshe, usynylyp otyrǵan ózgerister bılikti bólý júıesin jeńildetip, bolashaqta saıası daǵdarystardyń aldyn alýǵa múmkindik beredi.
Alaıda oppozıtsııa referendýmǵa boıkot jarııalaýǵa shaqyrdy. Onyń ókilderi Konstıtýtsııaǵa engiziletin ózgerister prezıdenttiń ókilettigin shamadan tys keńeıtedi dep esepteıdi.
– Túzetýler qoǵamdyq konsýltatsııalar ótkizilmeı ázirlendi. Sonymen qatar ózgeristerge qarsy taraptyń úgit-nasıhat júrgizý múmkindigi is júzinde shekteldi, al usynylǵan normalar prezıdenttiń ókilettigin proportsıonaldy emes deńgeıde arttyrady, – dep málimdedi oppozıtsııa ókilderi.
Referendým nátıjeleri seısenbiden erte jarııalanbaıtyny habarlandy.
Aldaǵy ýaqytta Gvıneıa-Bısaýda jalpyulttyq saılaý da ótýi tıis. Ol elde azamattyq basqarýdyń qaıta qalpyna kelýin bildiredi dep kútilip otyr.
2025 jyldyń kúzinde Batys Afrıkadaǵy Gvıneıa-Bısaý áskerıleri eldi «tolyq baqylaýǵa alǵanyn» málimdegen bolatyn. Sol kezde olar saılaý protsesiniń toqtatylǵanyn da jarııalady.
