Gvıneıa-Bısaý jastarynyń Qazaqstan JOO-larynda bilim alǵanyn qalaımyz — Ýmarý Sısoký Embalo

ASTANA. KAZINFORM — Gvıneıa-Bısaý jastary Qazaqstannyń joǵary tehnıkalyq oqý oryndarynda bilim alǵysy keledi. 

Bul týraly Memleket basshysy Qasym-Jomart Toqaevpen keńeıtilgen quramdaǵy kelissóz barysynda elimizge resmı saparmen kelgen Gvıneıa-Bısaý Prezıdenti Ýmarý Sısoký Embalo aıtty.

— Qazaqstan sońǵy jyldary turaqty damý maqsattaryn, onyń ishinde tabıǵı resýrstardy tıimdi paıdalaný, halyqtyń suranysyna jaýap bere alatyn ekonomıkalyq jáne áleýmettik saıasatty júzege asyrý aıasynda úlken tájirıbe jınaqtady. Biz ekonomıkalyq baılanysty, ózara tıimdi sharttarmen aýyl sharýashylyǵy, energetıka, tsıfrlyq tehnologııa, kómirsýtekti paıdalaný salasyndaǵy saýda-sattyq alys-berisin qoldaǵymyz keledi. Sonymen qatar, oqý men bilimge de aıryqsha nazar aýdaramyz. Osy oraıda Gvıneıa-Bısaý stýdentterine Qazaqstannyń joǵary tehnıkalyq oqý oryndarynda bilim alǵanyn qalaımyz. Biz osynaý múmkindikti birlese qarastyra alar edik, — dedi Gvıneıa-Bısaý Prezıdenti.

Mártebeli meıman eki eldiń tabıǵı resýrstaryn da birlesip ıgerý múmkindikterin qarastyrýǵa peıildi ekenin bildirdi.

— Elderimizdiń bir-birinen alshaq ornalasqanyna qaramastan memleketterimizdiń arasynda ózara tıimdi qarym-qatynas ornatqymyz keledi, — dedi Ýmarý Sısoký Embalo.

Buǵan deıin Memleket basshysy Qasym-Jomart Toqaev Aqordada elimizge resmı saparmen kelgen Gvıneıa-Bısaý Prezıdenti Ýmarý Sısoký Embalony saltanatpen qarsy alǵanyn jazǵan edik. 

Keńeıtilgen quramdaǵy kelissóz barysynda Qasym-Jomart Toqaev Qazaqstan Gvıneıa-Bısaýdy Afrıka qurlyǵyndaǵy mańyzdy seriktes retinde qarastyratyndyǵyn aıtty.