Gvatemalanyń úsh túrmesindegi tártipsizdikter kezinde 7 polıtsııa qyzmetkeri qaza boldy
ASTANA. KAZINFRM – Gvametalada qylmystyq toptardyń áreketimen baılanysty shabýyl kezinde 7 polıtsııa qyzmetkeri qaza boldy, dep habarlaıdy Al Jazeera.
Qandy oqıǵalar kóteriliske shyqqan tutqyndar basyp alǵan qatań rejımdegi túrmeni kúshtik qurylymdar qaıta baqylaýǵa alǵannan keıin birneshe saǵat ótpeı bolǵan.
Іshki ister mınıstri Marko Antonıo Vıleda jeksenbi kúni jýrnalısterge jasaǵan málimdemesinde shabýyldardyń el astanasy men oǵan irgeles aımaqtarda bolǵanyn aıtty. Nátıjesinde jeti polıtseı men bir bandanyń múshesi mert bolyp, taǵy on tártip saqshysy jaralanǵan.
Jaǵdaıdyń ýshyǵýyna baılanysty Bilim mınıstrligi mektepterde sabaqty toqtatty. Al astana bıligi jeksenbige belgilengen mádenı jáne oıyn-saýyq sharalaryn keıinge qaldyrdy.
— Biz bul ahýaldy prezıdent Bernardo Arevalomen talqyladyq. Qalalardaǵy qaýipsizdikti qamtamasyz etý jáne azamattardy qorǵaý úshin armııamen birlesken operatsııalar júrgizemiz. Biraq men bandalarmen eshqandaı kelissóz júrgizbeımin, — dedi Vıleda, óz ustanymyn qadap turyp.
Ulttyq azamattyq polıtsııa jeksenbi kúni óz qyzmetkerlerine qarsy keminde on shabýyl tirkelgenin málimdedi. Polıtsııa dırektory Devıd Kýstodıo Boteo bes kúdiktiniń ustalǵanyn habarlap, X áleýmettik jelisinde qaýipsizdik sharalary kúsheıtiletinin jáne polıtsııanyń birlese áreket etýi tıis ekenin jazdy.
Túrmeni shabýyldaý jáne kepildegilerdi bosatý
Jeksenbige qaraǵan túni júzdegen polıtsııa qyzmetkeri Renovacion 1 dep atalatyn qatań rejımdegi túrmege shabýyl jasap, kepilge alynǵandardy bosatýǵa kiristi. Operatsııa barysynda Barrio 18 bandasynyń jetekshisi, «El Lobo» laqap atymen belgili Aldo Dýppı ustaldy. Polıtsııa taratqan sýretterde onyń ıyǵynan jaralanyp, qansyraǵan kúıde túrmeden shyǵarylǵany kórinedi. Dýppı jıyntyq eseppen shamamen 2000 jylǵa sottalǵan.
Sonymen qatar, taǵy eki túrmede 37 adam áli de kepildikte otyr. Bıliktiń málimetinshe, senbide bastalyp, jeksenbige ulasqan úsh túzeý mekemesindegi búlik kezinde keminde 46 qyzmetker tutqynǵa alynǵan. Aldyn ala derekterge qaraǵanda, bul kóterilisti Barrio 18 músheleri óz jetekshisin jaǵdaıy jaqsy túrmege aýystyrýdy talap etip uıymdastyrǵan.
Vıleda buǵan deıin kepilge alynǵandar arasynda qaza tapqandar men aýyr jaralanǵandar joq ekenin aıtqan. Іshki ister mınıstrligi bul tártipsizdikterdi «banda basshylarynyń artyqshylyqtarynan aıyrylýyna tikeleı jaýap» dep baǵalady.
— Men terrorıstik toptarmen mámilege barmaımyn. Qoqan-loqyǵa da, bopsalaýǵa da kónbeımin, — dedi mınıstr. Onyń aıtýynsha, kepilge alynǵandardyń basym bóligi — kúzetshiler, arasynda psıholog ta bar.
Túrmelerdegi ahýal
Eldiń ońtústigindegi Eskýıntla qalasynda ornalasqan Renovacion 1 túrmesin polıtsııa men ásker qorshaýǵa alyp, mańaıda jedel járdem men órt sóndirý kólikteri kezekshilik etti. Kombınezon kıgen nemese maıka men sholaq shalbar, qoldan jasalǵan betperde taqqan tutqyndar kúzet munaralarynan tómendi baqylap turdy. Maska kıgenderdiń biri bıliktiń ózderin qorǵaı almaı otyrǵanyn aıtyp, qaýipsizdikke alańdaýshylyq bildirip, basqa túrmege aýystyrýdy talap etti.
Sońǵy jyldary Gvatemala túrme júıesin baqylaýda ustaýda úlken qıyndyqtarǵa tap bolyp otyr. Bandalardyń yqpaly kúsheıip, tutqyndar aýyr ári qaýipti jaǵdaılarǵa jıi shaǵymdanýda. Ótken qazanda prezıdent Arevalo 20 banda múshesiniń qashýynan keıin qaýipsizdik qyzmetindegi úsh joǵary laýazymdy sheneýniktiń otstavkasyn qabyldaǵan bolatyn.
— Túrme júıesi men bostandyqtaǵy qylmys arasyndaǵy baılanysty úzý qajet, — dedi Arevalo Associated Press-ke bergen suhbatynda, túrmelerge memlekettik baqylaýdy qaıtarýdyń mańyzyn erekshe atap ótip.
Osyǵan deıin Gvatemalada avtobýs kópirden qulap, 50-den astam adam qaza tapqany týraly jazdyq.
