Gvatemalada janartaýdyń atqylaýynan qaza tapqandar sany artty
GVATEMALA. QazAqparat - Gvatemaladaǵy Fýego janartaýynyń atqylaýy saldarynan qaza tapqandar sany artty, dep habarlaıdy CNN.
Gvatemala sot medıtsınasy ınstıtýty taratqan málimetterge qaraǵanda, jeksenbi kúni atqylaǵan janartaý kem degende 69 adamnyń ómirin qıǵan. Ázirge olardyń tek on jetisiniń ǵana tulǵasyn anyqtaý múmkin bolyp otyr. Taǵy 15 adam, sonyń ishinde 12 bala aýrýhanaǵa jetkizilgen. Buǵan deıin tabıǵat apaty saldarynan 1,7 mln adam qaýipsiz aımaqqa kóshirilgeni habarlanǵan bolatyn.
Janartaý teńiz deńgeıinen 10 shaqyrym bıiktikke deıin kúl shashqan, al jaıylý radıýsy 20 shaqyrymǵa deıin jetken. Bılik ókilderi janartaý materıaldarynyń jelmen birge odan ári taralý qaýpi bar ekenin aıtady.
Gvatemala prezıdenti Djımmı Morales tabıǵat apatyna baılanysty elde úsh táýlik ulttyq aza tutý kúnin jarııalady.
Gvatemala Ulttyq seısmologııa, výlkanologııa, meteorologııa jáne gıdrologııa ınstıtýtynyń málimdeýinshe, janartaýdyń atqylaýy jeksenbi kúni keshkisin toqtaǵan, alaıda ınstıtýt ókilderi janartaýdyń taǵy da atqylaýynan qaýiptenip otyr.
