Gvatemala túrmesindegi búlik: 8 adam ajal qushty (FOTO)
ASTANA. QazAqparat - Gvatemalada Pýerto-Barrıos qalasyndaǵy túrmede jańa jyl túninde oryn alǵan tártipsizdik saldarynan kem degende segiz adam qaza tapty. Jıyrmadan astam adam jaraqattandy.
Bılik oryndary habarlaǵandaı, jazasyn óteýshiler túrmeden qashpaq bolǵan, alaıda onyń aldy alyndy, dep jazdy Frans press.
Jergilikti BAQ habarlaǵan ózge nusqaǵa sáıkes, jazasyn óteýshiler Jańa jyldy toılap ishimdik ishken, aralarynda daý týyp, sońy tóbeleske ulasqan. Saldarynan olar matrastar men tósek-oryndardy órtegen, túrmede elektr energııasy óshirildi.
Búlik birneshe saǵatqa sozyldy. Polıtsııa jumanyń tańyna deıin olarmen arpalysty.
Jergilikti BAQ habarlaǵandaı, 175 adamǵa arnalǵan túrmede 900-den astam adam jazasyn ótep jatqan. 
