Gvatemala Prezıdenti esirtkini zańdastyrmaq
ASTANA. 27 naýryz. QazAqparat - Gvatemala Prezıdenti Otto Peres Molına esirtki saýdasymen kúresýdiń budan bylaı esh negizi joq ekenin aıtyp, endi ony zańdastyrǵannan basqa jol joq ekenin málimdedi, dep habarlaıdy VVS.
Onyń oıynsha, esirtkini zańdastyrý esirtki saýdasymen baılanysty qylmystardy sál de bolsa azaıtady.
Osy máseleni talqylaý úshin atalmysh eldiń basshysy Ortalyq Amerıka prezıdentterin shaqyryp, sammıt qurmaq bolǵan. Alaıda eń sońǵy mezette Nıkaragýa, Salvador jáne Gondýrastyń basshylary jıynǵa qatysýdan bas tartyp, oryndaryna basqa laýazymdy sheneýnikterdi jibergen kórinedi.
«Bizdiń esirtki trafıgimen 40 jyldan beri kúresip kele jatqan strategııamyzdyń túkke jaramaıtyny ábden belgili boldy», - dep málimdedi Otto Peres Molına. - Endi tyǵyryqtan shyǵatyn jańa joldar izdestirý kerek. Biz qalyptasyp qalǵan qupııalylyqty joıyp, «Osy máseleni talqylaıyq!» dep kúlli álemge jar salýymyz qajet».
