Gvatemala prezıdenti elde qylmystyń kúrt artýyna baılanysty tótenshe jaǵdaı jarııalady
ASTANA. KAZINFORM – Gvatemala prezıdenti Bernardo Arevalo qylmystyń kúrt artýy, penıtertsıarlyq mekemelerdegi tártipsizdikter jáne qaýipsizdik kúshterine shabýyldarǵa baılanysty búkil el boıynsha 30 kúnge tótenshe jaǵdaı jarııalady, dep habarlaıdy TASS aqparat agenttigi.
- Men búginnen bastap búkil el boıynsha 30 kúndik qorshaý rejımin engizý týraly sheshim qabyldadym. Onyń maqsaty – azamattardyń qorǵanysy men qaýipsizdigin kepildendirý jáne memlekettiń barlyq kúshin, eń aldymen Gvatemalanyń Ulttyq azamattyq polıtsııa men armııasyn bandylarmen kúresý jáne olardyń lańkestik áreketteriniń aldyn alý úshin paıdalaný, - dedi memleket basshysy jergilikti teledıdardan kórsetilgen halyqqa úndeýinde.
Prezıdent bıliktiń qylmystyq qurylymdarǵa jeńildik jasaý nıeti joq ekenin jáne zańdylyq pen tártipti qalpyna keltirý úshin qatań sharalar qabyldaýdy jalǵastyratynyn atap ótti. Ol zorlyq-zombylyqtyń kúrt artýy qylmystyq toptardyń jappaı tártipsizdikter men kepilge alý oryn alǵan túrmelerdi baqylaýǵa alý jónindegi úkimettik operatsııalarǵa jaýaby ekenin málimdedi. Prezıdent birlesken qaýipsizdik operatsııalarynyń nátıjesinde memleket birqatar túzeý mekemelerin baqylaýǵa tolyqtaı qol jetkizip, barlyq ustalǵandar bosatylǵanyn habarlady.
Prezıdent tótenshe jaǵdaı jarııalaý qoǵamdyq qaýipsizdikti qamtamasyz etýge tikeleı qatysty sharalardy qospaǵanda azamattardyń kúndelikti ómirine, memlekettik jáne jekemenshik mekemeler jumysyna nemese halyqtyń qozǵalys erkindigine áser etpeıtinine sendirdi.
Arevalo sondaı-aq qylmystyq toptar shabýyldarynyń qurbany bolǵan polıtsııa qyzmetkerleriniń qazasyna baılanysty úsh kúndik ulttyq aza tutý jarııalady.
- Olardyń batyldyǵy men adaldyǵy halyqqa qyzmet etýdiń máńgilik úlgisi bolyp qala beredi, - dep atap ótti ol.
Buǵan deıin Gvametalada qylmystyq toptardyń áreketimen baılanysty shabýyl kezinde 7 polıtsııa qyzmetkeri qaza bolǵanyn jazǵan edik.
