Gvardıola komandasyn Chempıondar lıgasynyń jartylaı fınalyna on ret shyǵarǵan birinshi bapker atandy
ASTANA. QazAqparat – Ispanııalyq maman Pep Gvardıola óz komandasyn Chempıondar lıgasynyń jartylaı fınalyna on ret shyǵarǵan birinshi bapker atandy, dep habarlaıdy QazAqparat tilshisi.
Shampionat.com saıtynan alynǵan málimetke qaraǵanda, Chempıondar lıgasy tarıhynda tek eki jattyqtyrýshy ǵana keminde toǵyz ret jartylaı fınalǵa joldama alǵan. Italııalyq maman Karlo Anchelottı osyndaı tabysqa toǵyz ret qol jetkizgen.
Gvardıola Chempıondar lıgasynyń jartylaı fınalyna «Barselonany» tórt márte (2008/2009, 2009/2010, 2010/2011 jáne 2011/2012 jylǵy maýsymdarda), «Bavarııa» (2013/2014, 2014/2015 jáne 2015/2016) men «Manchester Sıtı» klýbyn úsh retten (2020/2021, 2021/2022 jáne 2022/2023) shyǵaryp otyr.
Gvardıola bapkerlik etken klýbtar úsh ret qana («Barselona» 2008/2009, 2010/2011 jáne «Manchester Sıtı» 2020/2021 jylǵy maýsymdarda) fınalǵa joldama aldy. Ispanııalyq maman «Barselonamen» birge eki ret Chempıondar lıgasyn utty.
Bıylǵy maýsymda Gvardıolanyń «Manchester Sıtı» klýby Karlo Anchelottı jattyqtyratyn madrıdtik «Realmen» fınal joldamasyn sarapqa salady. Alǵashqy kezdesý Madrıdte «Santıagý Bernabeý» stadıonynda 9 mamyrda, qarymta oıyn osy aıdyń 17-sinde ótedi.
Ekinshi jartylaı fınalda qos mılandyq klýb «Inter» men «Mılan» sheberlik baıqasady.
Eske sala keteıik, budan buryn Chempıondar lıgasynda «Interdiń» 13 jyldan keıin jartylaı fınalǵa shyqqanyn jazǵan bolatynbyz.
