Gvardeısk garnızonynda áskerı qyzmetshi jaraqat aldy

ASTANA. KAZINFORM — Qazaqstan Respýblıkasy Qurlyq áskerleriniń baspasóz qyzmeti Gvardeısk garnızonyndaǵy áskerı bólimde bolǵan oqıǵaǵa qatysty resmı málimdeme jasady.

Vedomstvonyń habarlaýynsha, 2026 jylǵy 6 qańtarda áskerı bólimderdiń birinde merzimdi qyzmettegi áskerı qyzmetshi, qatardaǵy T., jaraqat alǵan. Tańǵy tekserý kezinde ol kazarma aldynda sol qolynyń saýsaqtaryn metall zatpen jaraqattap alǵan.

— Áskerı qyzmetshi dereý gospıtalǵa jetkizilip, qajetti medıtsınalyq kómek kórsetildi. Qazirgi ýaqytta onyń jaǵdaıy turaqty, ómirine qaýip tónip turǵan joq, dárigerlerdiń baqylaýynda, — delingen habarlamada.

Qurlyq áskerleriniń málimetinshe, bul áreket jeke basyndaǵy sebepterge baılanysty jasalǵan jáne áskerı boryshty ótkerýmen, sondaı-aq áskerı bólim komandırleriniń nemese laýazymdy tulǵalardyń is-áreketterimen baılanysy joq. Áleýmettik jelide habarlanǵandaı, tikeleı basshynyń eskertýinen keıin jaraqat alǵany týraly aqparat shyndyqqa sáıkes kelmeıdi.

— Oqıǵa boıynsha qylmystyq is qozǵalyp, Іshki ister mınıstrliginiń Ońtústik óńirlik áskerı-tergeý basqarmasynyń Gvardeısk bólimi tergeý júrgizip jatyr. Sonymen qatar Qurlyq áskerleri Bas qolbasshysynyń tapsyrmasymen oqıǵa ornyna arnaıy komıssııa jiberildi. Onyń quramynda onyń tárbıe jáne ıdeologııalyq jumys jónindegi orynbasary bar. Jaǵdaı qolbasshylyqtyń baqylaýynda, — delingen habarlamada.

QR Qurlyq áskerleri BAQ pen áleýmettik jeli qoldanýshylaryn resmı tergeý aıaqtalǵanǵa deıin rastalmaǵan aqparat taratpaýǵa jáne asyǵys qorytyndy jasamaýǵa shaqyrdy. Jalǵan aqparat taratqandar zań boıynsha jaýapkershilikke tartylatyny eskertildi.

Budan buryn Shymkentte sarbazdyń qaıtys bolýyna qatysty qylmystyq is qozǵalǵanyn jazǵan edik.