Gvardeısk garnızonynda 600 sarbaz áskerı-eseptik mamandyqty meńgerdi
ASTANA. KAZINFORM — Gvardeısk garnızonyndaǵy Qurlyq áskerleriniń oqý-jattyǵý ortalyǵynda 600 áskerı qyzmetshige ekonomıkanyń naqty sektorynda talap etiletin áskerı-eseptik mamandyqtar alǵany jóninde sertıfıkattardy tapsyrý rásimi ótti.
Qorǵanys mınıstrligi baspasóz qyzmetiniń málimetinshe, oqý ornynda Astana, Almaty, Taraz, Shymkent, Oral, Qostanaı jáne Óskemen qalalarynan áskerge alynǵandar jas jaýynger kýrsynan ótip, áskerı ant berdi.
Bes aıdyń ishinde sarbazdar T-72 tankiniń mehanık-júrgizýshisi, jaıaý áskerdiń jaýyngerlik mashınasy, KamAZ-43114, «Oral-4320» júrgizýshisi jáne aspaz mamandyqtaryn ıgerdi.
— Búgin sender daıyndyqtyń mańyzdy kezeńin aıaqtap, qajetti mamandyqtardy aldyńdar. Osynda alǵan bilim men daǵdylardy áskerı qyzmetti ótkerý kezinde ǵana emes, sonymen qatar azamattyq ómirde de barynsha qoldanady dep senemin. Senderge óz qabiletterińe degen senimdilik, kásibı ósý, áskerı boryshqa adaldyq jáne Otan ıgiligi jolynda jańa jetistikter tileımin, — dedi 30212 áskerı bóliminiń komandıri polkovnık Maqsat Turapbaev.
Júrgizýshi kýrsyn oqyǵan sarbazdar S jáne S1 sanatyndaǵy júrgizýshi kýáligin aldy. Olar áskerı kólik tehnıkasyn basqarady, jeke quram men júkterdi tasymaldaý jónindegi mindetterdi oryndaıdy, al merzimdi áskerı qyzmetin aıaqtaǵannan keıin — kólik, logıstıka jáne júk tasymaldaý salasyna jumysqa kire alady.
— Men Shymkentten keldim. Munda «Oral» avtokóliginiń júrgizýshisi kýrsyn oqyp, kýáligin aldym. Bul tájirıbe qyzmet barysynda ǵana emes, bolashaqta da paıdaly bolatyn mamandyq alýǵa berilgen múmkindik, — dedi qatardaǵy jaýynger Tahır Ábdirazaqov.
Oqý aıaqtalǵannan keıin áskerı qyzmetshiler oqý-jaýyngerlik mindetterdi oryndaýǵa daıyndyǵyn rastaı otyryp, biliktilik emtıhandaryn sátti tapsyrdy.
Bir jyl ishinde Qurlyq áskerleriniń oqý-jattyǵý ortalyǵy Qarýly kúshterdiń áskerı bólimderine qyzmet etýge 1200 kishi maman daıarlap shyǵaratynyn aıta ketken jón.
Buǵan deıin jasandy ıntellektige negizdelgen kameralar Ulttyq ulan sarbazdaryn baqylap otyratynyn jazdyq.