Gvardeısk garnızonynda 600-den astam sarbaz ant berdi
ASTANA. KAZINFORM — Qarasaı batyr atyndaǵy Qurlyq áskerleriniń oqý ortalyǵynda 620 merzimdi áskerı qyzmetshiniń áskerı ant qabyldaýyna arnalǵan saltanatty rásim ótti. Bul týraly Qorǵanys mınıstrligi habarlady.
Іs-sharaǵa Gvardeısk garnızonynyń bastyǵy, áskerı prokýratýra men áskerı polıtsııa ókilderi, Qarýly kúshterdiń ardagerleri, sondaı-aq sarbazdardyń týǵan-týystary men jaqyndary qatysty.
Sharanyń ashylýynda sóz sóılegen oqý ortalyǵynyń komandıri gvardııa polkovnıgi Maqsat Turapbaev jas áskerı qyzmetshiler alty aı boıy oqýdan ótetinin atap ótti.
— Bizdiń ortalyqta oqytý arnaıy jabdyqtalǵan oqý korpýstarynda uıymdastyrylǵan. Sarbazdar júıeli daıarlyqtan ótip, urys mashınalarynyń operatory, júk jáne jer qazý mashınalarynyń mehanık-júrgizýshisi, kóp maqsatty jeńil brondalǵan tartqyshtyń mamany, aspaz jáne basqa da áskerı-eseptik mamandyqtardy meńgeredi, — dedi ol.
Oqý ortalyǵynyń zamanaýı materıaldyq-tehnıkalyq bazasy áskerı qyzmetshilerge aldaǵy qyzmetine qajetti berik kásibı bilim men tájirıbelik daǵdylardy ıgerýge múmkindik beredi.
— Búgin men úshin shyn máninde umytylmas kún. Ómirimdegi jaýapty sátti ata-anammen birge bólisýge múmkindik týdy. Olardyń úmitin aqtap, komandırlerdiń senimine laıyq bolýǵa tyrysamyn, — dedi sarbaz Meıram Qasym.
Oqýdy aıaqtaǵannan keıin áskerı qyzmetshiler Qurlyq áskerleriniń quramalary men áskerı bólimderine ári qaraı qyzmet ótkerý úshin jiberiledi. Sarbazdardy bólý olardyń daıyndyq deńgeıi, meńgergen mamandyqtary, sondaı-aq áskerdiń ózekti mindetteri men qajettilikteri eskerile otyryp júzege asyrylady.
Budan buryn Aqmolada Áýe shabýylyna qarsy qorǵanys áskerleriniń sarbazdary áskerı ant bergenin jazǵanbyz.