Gvardeısk áskerı garnızonynda 52 otbasy jańa páterdiń kiltin aldy

GVARDEISK. QazAqparat - Jańa jyl qarsańynda Gvardeısk qala tıptes kentinde kúrdeli jóndeýden ótken 52 páterli turǵyn úı paıdalanýǵa berildi, dep habarlaıdy QazAqparat.

Qorǵanys mınıstriniń tyl jáne áskerı ınfraqurylym jónindegi orynbasary general-leıtenant Muhamedjan Talasov áskerı qyzmetshilerdiń otbasyna páter kiltin saltanatty jaǵdaıda tabys etti.

Qonystoı ıelerin quttyqtaýǵa «Ońtústik» óńirlik qolbasshylyǵy áskerleriniń qolbasshysy general-maıor Mereke Kóshekbaev, Gvardeısk garnızonynyń bastyǵy polkovnık Erjan Meıirmanov, QRQK Áskerı ınfraqurylym bas basqarmasy bastyǵynyń mindetin ýaqytsha atqarýshy zapastaǵy polkovnık Baǵyt Kerimbaev, sondaı-aq kúrdeli jóndeý jumystaryn júrgizgen «Edil-Jaıyq» JShS basshylyǵy qatysty.

– Memleket basshylyǵy, Qorǵanys mınıstri áleýmettik máselelerge, onyń ishinde birinshi kezekte áskerı qyzmetshilerdi turǵyn úımen qamtamasyz etýge zor kóńil bólip keledi. Sol sebepti jańa jyl merekesine deıin turǵyn úıdi paıdalanýǵa berýge kúsh salyndy. Sizderdi qonystoımen quttyqtaımyn! Úılerińiz jyly, eńbekterińiz jemisti, otbasylaryńyz aman bolsyn, – dedi general-leıtenant Muhamedjan Talasov.

Áskerı qyzmetshilerdiń ózderi atap ótkendeı, búgingi oqıǵa olar úshin aldaǵy ýaqytta da úlgili qyzmet etýge yntalandyrý bolmaq.

– Bizdiń otbasymyz úshin bul erekshe oqıǵa bolyp otyr. Biz jańa páterdiń kiltin aldyq. Basshylyqtyń qamqorlyǵy úshin kóp rahmet. Týystarymyz da qýanyp jatyr, – deıdi ınjenerlik-saperlik polktiń áskerı qyzmetshisi 3-synypty serjant Baýyrjan Ótebaly.

Foto: Qazaqstan Respýblıkasy Qorǵanys mınıstrliginiń Baspasóz qyzmeti