Gýterrısh: Biz adamzat pen mashınalar arasynda qatar ómir súrý erejesin belgileı alatyn sońǵy urpaqpyz
ASTANA.KAZINFORM - Búgin Shveıtsarııanyń Jeneva qalasynda jasandy ıntellektini basqarý boıynsha (Global Dialogue on AI Governance) BUU-nyń alǵashqy jahandyq dıalogy ashyldy.
BUU Bas Assambleıasynyń qararymen qurylǵan is-shara úkimetterdiń, bıznestiń, akademııalyq ortanyń jáne azamattyq qoǵam ókilderin HHІ ǵasyrdyń eń yqpaldy tehnologııalarynyń birin retteýge úılestirilgen tásilderdi ázirleý úshin biriktirdi.
BUU Bas hatshysy Antonıý Gýterrısh ashylý saltanatyna qatysyp, talqylaýdyń negizgi baǵytyn belgiledi.
- Biz adamzat pen mashınalar arasynda qatar ómir súrý erejesin belgileı alatyn sońǵy urpaqpyz, - dedi BUU Bas hatshysy óz sózinde.
Ol jasandy ıntellekttiń údemeli qaýipteri týraly eskertip, ony retteý úshin shuǵyl jahandyq sharalar qabyldaýǵa shaqyrdy.
Jasandy ıntellekt adamzat ilese almas jyldamdyqpen damyp keledi. Bizdiń qoǵam josparsyz jáne kelisimsiz tájirıbeden ótkizilip jatyr. Bul turaqsyz. Jáne qabyldaýǵa kelmeıdi.
Endigi másele jasandy ıntellekt bizdiń álemimizdi ózgerte me, joq pa, másele onda emes - ol qazirdiń ózinde ózgerip jatyr. Másele biz bul transformatsııany birge basqaramyz ba, álde oǵan bizdi basqarýǵa múmkindik beremiz be degen suraqta.
Dıalogtyń ashylýy belgili ǵalym Ioshýa Benjıo men Nobel beıbitshilik syılyǵynyń laýreaty Marııa Ressa tóraǵalyq etken jasandy ıntellekt boıynsha táýelsiz halyqaralyq ǵylymı paneldiń alǵashqy esebiniń tusaýkeserimen tuspa-tus keldi. Qujatta tehnologııalyq damý retteýshi mehanızmderden aıtarlyqtaı asyp túsetini atalyp ótken.
Tsıfrlyq kún tártibi men ulttyq jasandy ıntellekt strategııalaryn belsendi túrde damytyp jatqan Qazaqstan úshin bul dıalogqa qatysý erekshe mańyzdy.
Sondyqtan, sammıtke Qazaqstan Respýblıkasy Premer-Mınıstriniń orynbasary jáne jasandy ıntellekt jáne tsıfrlyq damý mınıstri J.Mádıeva bastaǵan elimizdiń ókildik delegatsııasy qatysyp jatyr.
Jenevadaǵy is-shara (6-7 shilde) aqparattyq qoǵam jónindegi dúnıejúzilik forýmmen (WSIS) bir mezgilde jáne jasandy ıntellekt úshin jahandyq sammıttiń (7-10 shilde) aldynda ótip, Shveıtsarııa qalasyn jasandy ıntellekt boıynsha halyqaralyq pikirtalastar ortalyǵyna aınaldyrady.
Jeksenbi kúni tańerteń J. Mádıeva Halyqaralyq telekommýnıkatsııa odaǵynyń bas hatshysy Dorın Bogdan Martınmen kezdesti.
