Gýterrısh: BUU Qaýipsizdik keńesiniń quramy reformalaýdy qajet etedi

ASTANA. KAZINFORM –  BUU Bas hatshysy Antonıý Gýterrısh Qaýipsizdik Keńesin reformalaý oryndy ekenin málimdedi, dep habarlaıdy TASS. 

Óıtkeni onyń qazirgi quramy búgingi álemge saı kelmeıdi, 1945 jyldyń jaǵdaıyn kórsetedi, bul óz kezeginde zańdylyq pen tıimdilikke qatysty problemalar týǵyzady. Ol bul týraly uıymdy reformalaýdyń qajettiligine qatysty jýrnalısterdiń suraǵyna jaýap bergende aıtty.

— Qaýipsizdik Keńesin reformalaý — tolyqtaı qısyndy nárse. Onyń qazirgi quramy zamanaýı álemge sáıkes kelmeıdi. Bul — 1945 jyldyń shyndyǵyna saı keletin qurylym. Sondyqtan ol tek zańdylyq turǵysynan emes, sonymen birge tıimdilik turǵysynan da másele týdyryp otyr, — dedi Gýterrısh.

Bas hatshy ásirese adam quqyqtarynyń jappaı buzylýy jaǵdaılarynda veto quqyǵyn shekteý týraly Frantsııa men Ulybrıtanııanyń usynystaryna «yqylaspen» qaraıtynyn atap ótti. Ol ózin Qaýipsizdik Keńesin reformalaý qajettiligi jóninde turaqty túrde aıtyp júrgen alǵashqy Bas hatshy ekenin de jetkizdi.

Gýterrısh reformalaý máselesinde belgili bir ilgerileý bar ekenin aıtty.

— Qazir bul baǵytta shyndap jumys istep jatqan komıtet bar. Sonymen qatar, mysaly, turaqty bestikke kiretin keıbir memleketterdiń ózi Afrıkaǵa turaqty múshelik quqyǵy berilýi tıis ekenin moıyndady, — dedi ol.

Sonymen birge ol Qaýipsizdik Keńesin reformalaý men veto quqyǵy jónindegi túpkilikti sheshimdi tek múshe memleketterdiń qabyldaı alatynyn eske saldy.