«Ǵusman Qosanov Memorıalyna» 10 elden 300-ge jýyq sportshy qatysady
ASTANA. QazAqparat - 29-30 maýsym kúnderi Almatydaǵy Ortalyq stadıonda jeńil atletıkadan ótetin halyqaralyq «XXVIII Ǵusman Qosanov Memorıalyna» 10 elden 300-ge jýyq sportshy qatysady, dep habarlaıdy QazAqparat tilshisi.
QR Jeńil atletıka federatsııasy taratqan málimetterge súıensek, Rım Olımpıadasynyń kúmis júldegeri atyndaǵy dástúrli jarysqa Qazaqstannan bólek, Iran, Ózbekstan, Grýzııa, Tájikstan, Sırııa, Ázerbaıjan, Túrikmenstan, Kenııa, Qyrǵyzstan syndy elderden eń súzdik sportshylar keledi.
«Ǵ. Qosanov Memorıaly» - Azııa qurlyǵynyń Ortalyq Azııa aımaǵyndaǵy jeńil atletıkadan úzdik halyqaralyq týrnır bolyp sanalady. Bul jarys Halyqaralyq jeńil atletıka federatsııalary qaýymdastyǵynyń (IAAF) jáne Azııa jeńil atletıka qaýymdastyǵynyń (AAA) kúntizbesine engizilgen.
Ǵusman Qosanovty eske túsirýge arnalǵan jarys alǵash ret 1991 jyly ótkizilgen.
Aıta keteıik, Ǵusman Syıtyquly Qosanov 1935 jyly 25 mamyrda Shyǵys Qazaqstan oblysy, Besqaraǵaı aýdany, Izatýlla aýylynda dúnıege kelgen. Olımpıada oıyndaryna tuńǵysh qatysqan jáne Olımpıada júldesin tuńǵysh jeńip alǵan qazaq atleti.
Ol 1960 jyly Rım olımpıadasynda kúmis medalǵa ıe boldy. Italııa astanasynda 4h100 estafetalyq jarysta KSRO qurama komandasy sapynda L. Bartenev, ıÝ. Konovalov, E. Ozolındermen birge márege ekinshi keldi. Qosanov sondaı-aq 1960 jylǵy Olımpıada oıyndarynda 100 metrlik qashyqtyqta da jarys alańyna shyqqan bolatyn. Jekeleı synda 10,7 sekýnd nátıjesimen jalpy esepte 6-orynǵa taban tiredi.
Ǵusman Qosanovtyń basqa da ataqtary jeterlik. Eýropa chempıony, KSRO chempıonatynyń kúmis júldegeri, Qazaqstannyń birneshe dúrkin chempıony, KSRO halyqtary spartakıadasynyń jeńimpazy. Tipti, jeńil atletıkadan qazaq jastary arasynan shyqqan tuńǵysh sport sheberi.
