Ǵusman Qyrǵyzbaev pen Sherzod Davlatov Aýstrııa Gran-prıiniń jartylaı fınalynda
ASTANA.KAZINFORM – Búgin Aýstrııanyń Lınts qalasynda bastalǵan dzıýdodan Gran-prı týrnırinde otandasymyz jartylaı fınalǵa joldama aldy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Erler arasynda -60 kg salmaqta Sherzod Davlatov irikteýde Slovenııa, Izraıl, sosyn Japonııa palýanynan basym tústi. Endi búgin keshke jartylaı fınalda ýkraınalyq Dılshod Halmatovpen kúsh synasady. Osy salmaqtaǵy taǵy bir otandasymyz Aman Baqytjan jubanysh kezeńinde Mýrad Mýradlımen (Ázerbaıjan) kúresedi.
Parıj Olımpıadasynyń qola júldegeri Ǵusman Qyrǵyzbaev (-66 kg) irikteýde Beıtarap atletti, Italııa jáne Grýzııa dzıýdoshysyn jeńdi. Kelesi qarsylasy - Ronald Lıma (Brazılııa).
Buǵan deıin Ábıba Ábýjaqynova Aýstrııadaǵy Gran-prı týrnıriniń jubanysh kezeńinde kúresetinin jazǵan bolatynbyz.
Aıta keteıik, búgin 2026 jylǵy qysqy Paralımpıada oıyndarynyń ashylý saltanaty ótedi.