Ǵusman Qyrǵyzbaev pen Merýert Sársenova Azıadanyń qola medali úshin baq synaıdy
ASTANA. KAZINFORM — Qazaqstandyq dzıýdoshy Ǵusman Qyrǵyzbaev Aıchı-Nagoıada (Japonııa) ótip jatqan Azııa oıyndarynyń jartylaı fınalynda jeńilip qaldy, dep habarlaıdy UOK baspasóz qyzmeti.
Otandasymyz 66 kelige deıingi salmaqta fınalǵa shyǵý úshin ótken beldesýde mońǵolııalyq Iolk Kazırbekpen kezdesti.
Nátıjesinde mońǵolııalyq sportshy «vazarı» upaıyn ıelenip, jeńiske jetti.
Al Ǵusman Qyrǵyzbaev qola medal úshin qytaılyq Sıýe Tszyıanmen kúresedi.
Sonymen qatar qazaqstandyq Merýert Sársenova dzıýdodan Aıchı-Nagoıada (Japonııa) ótip jatqan Azııa oıyndarynda jubanysh beldesýinde jeńiske jetti.
Otandyq dzıýdoshy 52 kelige deıingi salmaqta Tájikstan ókili Madına Kýrbonzodamen kezdesti. Qosymsha ýaqytta Merýert Sársenova tıimdi ádis jasap, jeńiske jetti.
Osylaısha ol qola medal úshin kúresýge múmkindik aldy.
Buǵan deıin Eldos Smetov 2026 jylǵy Azıadanyń fınalyna ótkenin jazǵanbyz.
Sondaı-aq, Ábıba Ábýjaqynova dzıýdodan altyn medal úshin kúresetini belgili boldy.
