Ǵusman Qyrǵyzbaev: Basty maqsatym – 2028 jyly ótetin Olımpıadada jeńis tuǵyryna kóterilý
ASTANA. KAZINFORM – 9-11 mamyr aralyǵynda Astana qalasynda dzıýdodan Qazaqstan barysy Grand Slam týrnıri ótedi. Atalǵan jarysta álemniń túkpir-túkpirinen birneshe Olımpıada júldegeri baq synaıdy.
Sonyń ishinde 2024 jylǵy Olımpıadanyń qola júldegeri Ǵusman Qyrǵyzbaevtyń tatamıge qaıta oralýy – basty jańalyqtardyń biri. Qazaqstandyq balýan Olympic.kz saıtyna bergen suhbatynda daıyndyq barysyn pysyqtap, quramadaǵy ózgerister jaıly aıtyp berdi.
- Olımpıada oıyndarynan keıin sportty ýaqytsha umytyp, jeti aıǵa jýyq demalys aldym. Qańtar aıynan bastap oqý-jattyǵý jıyndaryna qatysa bastadym. Alǵashynda ulttyq quramanyń qarqynyna ilesý óte qıyn boldy. Alaıda qazir bári jaqsy. Bapkerlerdiń bergen tapsyrmalaryn buljytpaı oryndap júrmiz. Olımpıada oıyndarynyń júldegeri retinde bul jolǵy jattyǵýlar erekshe lázzat syılap jatyr. Qandaı jattyǵý bolsa da, ózim rahattanyp oryndaımyn. Sonymen qatar Parıjde qola júlde jeńip alǵan soń, óz-ózime degen senimdiligim artty. Al jarystyń nátıjesi tatamı ústinde belgili bolady, - deıdi sportshy.
Ol jańa bapkerlik quramnyń kelýine baılanysty qandaı ózgeris bolyp jatqanyn aıtyp berdi.
- Jalpy, ár bapkerdiń ózindik ádis-tásili bolady ǵoı. Robert Mshvıdobadzeniń daıyndaý júıesi múlde bólek eken. Bir baıqaǵanym — bul bapkerler bir ǵana jaryspen shektelmeı, alda bolatyn iri halyqaralyq dodalarǵa erekshe mán beredi. Negizgi maqsat — álem chempıonattary men Olımpıada oıyndarynda joǵary nátıje kórsetý. Al basqa týrnırler tájirıbe jınap, óz múmkindigińdi synap kórýge arnalǵan. Jattyǵý jospary men tapsyrmalary kóńilimnen tolyq shyǵyp jatyr, - deıdi Ǵusman Qyrǵyzbaev.
Sportshy aldaǵy jospary, 2028 jyly ótetin Olımpıada oıyndaryna daıyndyq týraly sóz qozǵady.
- Olımpıadadan keıin birinshi oqý-jattyǵý jıynyna kelmesten buryn bapker Robert Mshvıdobadze habarlasty. «Daıyndyqqa qashan kelesiń?» dep suraǵan bolatyn. «Qańtar aıynda» dep jaýap bergen edim. Bapker: «Eger keletin bolsań, Olımpıadaǵa deıingi aldaǵy tórt jylǵa naqty maqsat qoıyp kel», - dedi. Endi basty maqsatym – osy oqý-jattyǵý jıyndarynda barlyq kúsh-jigerimdi jınap, 2028 jyly ótetin Olımpıada oıyndaryna baryp, jeńis tuǵyryna kóterilý, - dedi sportshy.
Aıta keteıik, Olımpıada júldegeri Ǵusman Qyrǵyzbaev Qazaqstan Barysy Grand Slam jarysynda tatamıge shyǵady.