Gýrbangýly Berdimuhamedov ShYU sammıtine qatysý úshin Astanaǵa keldi
ASTANA. KAZINFORM – Túrikmenstan Halk Maslahatynyń tóraǵasy Gýrbangýly Berdimuhamedov Qazaqstan astanasyna keldi. Áýejaıda túrikmen halqynyń Ulttyq kóshbasshysyn Qazaqstan Premer-Mınıstri Oljas Bektenov qarsy aldy.
Gýrbangýly Berdimuhamedov alǵash ret ótkizilip otyrǵan «ShYU plıýs» formatyndaǵy kezdesýge qatysady, ol «Kópjaqty dıalogty nyǵaıtý – ornyqty beıbitshilik pen damýǵa umtylý» uranymen ótedi. Otyrysqa baıqaýshy memleketterdiń basshylary, qurmetti qonaqtar jáne halyqaralyq uıymdardyń ókilderi qatysady.
Qazaqstan men Túrikmenstan arasyndaǵy dıplomatııalyq qatynastar dostyq pen strategııalyq áriptestik negizinde damýda. Tranzıttik-kólik salasynda birlesken ózara tıimdi jobalar bar, gaz salasyndaǵy yntymaqtastyqty damytý boıynsha qadamdar belgilengen.
Ótken jyldyń qorytyndysy boıynsha Qazaqstan men Túrikmenstan arasyndaǵy ózara saýda kólemi $563 mln qurady, osylaısha 2022 jylmen salystyrǵanda 28%-ǵa ulǵaıdy. Bıyl da oń úrdis saqtaldy: 4 aıda ózara saýda kólemi ósip, $167,8 mln-ǵa jetti.
Aıta keteıik, Astanada ótetin Shanhaı yntymaqtastyǵy uıymynyń sammıtine qatysý úshin elimizge Reseı prezıdenti Vladımır Pýtın, BUU Bas hatshysy Antonıý Gýtterısh, Mońǵolııa prezıdenti Ýhnaagıına Hýrelsýhan, Ázerbaıjan prezıdenti Ilham Alıev, Pákistan Premer-Mınıstri Shahbaz Sharıf, Tájikstan prezıdenti Emomalı Rahmon, Ózbekstan prezıdenti Shavkat Mırzıeev, Qyrǵyz Respýblıkasynyń prezıdenti Sadyr Japarov, Túrkııa basshysy Rejep Taııp Erdoǵan, Qatar ámiri Sheıh Támım ben Hamad Ál Tánı, Iran Islam Respýblıkasynyń prezıdentiniń mindetin atqarýshy Mohammad Mohber jáne t.b. keldi. Al, Qytaı Halyq Respýblıkasynyń tóraǵasy Sı Tszınpın Astanaǵa 2 shilde kúni keldi. Memlekettik saparmen kelgen tóraǵany áýejaıdan Qasym-Jomart Toqaev saltanatty túrde qarsy aldy.
