Ǵun ımperııasynyń qurylǵanyna 2011 jyly 2220 jyl tolady - tarıhshy Islam Qabyshuly
ALMATY. 19 qarasha. QazAqparat /Erlik Erjanuly/ - Álemdegi túrki tildes halyqtyń sany 210 mıllıon adamdy quraıdy.
Bul jaıly búgin Almatyda sheteldegi qazaqtardyń avtorlyǵymen Dúnıejúzi qazaqtary qaýymdastyǵynyń "Atajurt" baspasynan jaryq kórgen jańa kitaptardyń tusaýkeserinde aıtyldy.
"Kelesi jyly ǵun ımperııasynyń qurylǵanyna 2220 jyl tolady. Túrki halyqtarynyń álemge áıgili 3 úlken qolbasshysy bolǵan. Eń birinshisi, Ǵun Shaı Lıý degen kisi. Ekinshisi, Eýropaǵa Atılla degen atpen áıgili bolǵan Edil batyr. Úshinshisi, Shyńǵys han", - deıdi tarıh ǵylymynyń doktory, professor Islam Qabyshuly.
"Turan álemi" dep atalatyn jańa kitabyn qazaqstandyq oqyrmannyń nazaryna usynǵan belgili mońǵolııalyq ǵalym: "Bul 20-30 jyldyq zertteý eńbegimniń nátıjesi. Onda túrki tektes 2 táýelsiz respýblıkanyń, 26 ult pen ulystardyń tarıhy tarazylanyp, olardyń álem órkenıetine qosqan úlesi sóz bolady. Osy ýaqytqa deıin túrki halyqtarynyń qolbasshylary men danyshpandaryn eýropalyqtar ǵana zerttep kelgen bolatyn", - dedi.
Byltyr Mońǵolııada jaryq kórgen bul týyndyny ǵalymdar eń úzdik ǵylymı eńbek dep jarııalap, ol úkimet sheshimimen barlyq kitaphanalarǵa taratylǵan bolatyn. Endi oǵan orys, qytaı tilderine aýdarýǵa ótinishter túsip jatqan kórinedi.
