Ǵumar Qarash atyndaǵy mektepke 500 dápter tabys etildi - BQO
ORAL. 16 tamyz. QazAqparat - 15 tamyz kúni Qaztalov aýdanyndaǵy Ǵ.Qarash atyndaǵy mektepke syrtqy muqabasyna aqyn Ǵumar Qarashtyń beınesi salynǵan 500 dápter tabys etildi.
«Jaıyq Press» JShS ótken jyldan beri syrtqy muqabasynda ult tulǵalary beınelengen oqýshy dápterlerin shyǵaryp keledi. Osy ıgi bastama jalǵasyn taýyp, endi oıshyl aqyn Ǵumar Qarashty dáripteıtin dápter basyldy.
Qaztalov aýdanyndaǵy Ǵumar Qarash atyndaǵy Qaraoba mektep-gımnazııasy bul dápterdiń alǵash bolyp 500 danasyna tapsyrys bergen bolatyn. Sol dápterlerdi «Jaıyq Press» JShS-nyń bas dırektory Jantas Safýllın atalmysh bilim oshaǵynan kelgen ókilge saltanatty túrde tabystady.
- Ǵumar Qarash - nasıhattalmaı, zerttelmeı qalǵan uly tulǵa. El úshin eńbek etken azamattarymyzdy dáripteýdiń ár túrli joldary bolsa, olardyń sýreti beınelengen dápter shyǵarý da - sonyń biri. Jalpy, búldirshindi eljandy, patrıot etip tárbıeleý úshin onyń oqý-quraldarynan-aq ulttyq qundylyqtarymyz, memlekettiń ıdeologııasy kórinis tabýy kerek. Sol sebepti muny ózimiz jasamasaq, bizge ózge el kelip ulttyq dúnıetanym, tarıhymyz ben tulǵalarymyzdy ulyqtap bermeıdi. Bul dápterdiń syrtyndaǵy ult tulǵalarynyń beınesi balanyń kún saıyn kóz aldynda bolǵasyn jadynda saqtalady. Al sońǵy betinde tulǵalardyń ómirbaıandary men el úshin atqarǵan isteri jazylǵan. Ony da jas órender sanasyna sińirip, sol tulǵalardaı bolýǵa umtylady, - dedi J.Safýllın.
-1997 jyly mektebimizge Ǵumar babanyń esimi berildi. Mektep aýlasyna aqynnyń shaǵyn músinin qoıdyq. Toǵyzynshy jyl qatarynan aqynnyń atyna kir keltirmeı, bilim sapasy jóninen aýdan boıynsha aldyńǵy oryndamyz. Aqyn óleńderin mánerlep oqý saıysyn ótkizý mektebimizdiń dástúrine aınaldy. Synyp saǵattarynda da jerles qoǵam qaıratkeriniń ómiri men shyǵarmashylyǵyn jetkinshekterdiń sanasyna quıyp kelemiz. Bul dápterdi oqýshylarymyz uqypty ustary anyq,- dedi Ǵumar Qarash atyndaǵy Qaraoba mektep-gımnazııasy dırektorynyń orynbasary Nurııa Ibatova.
Muqabasy túrli-tústi, baǵasy 75 teńge turatyn 36 bettik bul dápterdiń basylý sapasy joǵary. Syrtqy betindegi uly tulǵanyń sýreti men bir shýmaq óleńi, týǵan dalanyń tabıǵaty kózdi eriksiz tartsa, sońǵy betinen jaǵasyn Ǵumardyń atasy mekendegen Qarash kólin kórýge bolady.
«Jaıyq Press» JShS-nyń bas dırektory Jantas Safýllın J.Dosmuhamedov atyndaǵy pedagogıkalyq kolledj Jahanshanyń sýreti beınelengen dápterge tapsyrys bergenin, keleshekte London olımpıadasynan altyn medal alyp qaıtqan jeńimpazdarymyz beınelengen dápterler shyǵarý da josparda bar ekenin aıtty. «Jaıyq Press» baspahanasynan buǵan deıin uly Abaıdyń, Mahambet, Isataı, Syrym, Raıymbek batyrlardyń, Qurmanǵazy, Dına kúıshilerdiń sýretteri basylǵan dápterler shyqqan bolatyn.
