Gýmanoıd robot jartylaı marafonnan erler arasyndaǵy rekordty jańartty
ASTANA. KAZINFORM –Beıjiń Ichjýan-2026 gýmanoıd robottar jartylaı marafony 19 sáýir kúni ótti, jarys nátıjesinde jartylaı marafonnan erler arasyndaǵy rekord jańartyldy, dep habarlaıdy Lianhe Zaobao basylymy.
Jarys qorytyndysy boıynsha, Monkey King komandasynyń Naızaǵaı atty roboty 50 mınýt 26 sekýndta máreni aldymen qıyp ótip, bıyl naýryz aıynda Lıssabon jartylaı marafonynda ýgandalyq jeńil atlet Djeıkob Kıplımo ornatqan 57 mınýt 20 sekýndtyq álemdik rekordty jańartty.
Jarys uıymdastyrýshylarynyń aıtýynsha, marafonda shekteýdi buzý men úzdiksiz umtylý bárinen mańyzdy, robototehnıka salasynyń damýy da marafon sekildi uzaqmerzimdi ınvestıtsııalaý men tabandy jańǵyrtýdy qajet etedi.
Ashyq derekkózderden belgili bolǵandaı, Beıjiń Ichjýan robottar jartylaı marafony - Qytaı jeńil atletıka qaýymdastyǵy sertıfıkattaǵan A1 sanatyndaǵy jarys. Marafon aıasynda bıyl alǵash ret «adam men robottardyń qatar júgirýi» iske asyryldy, atap aıtqanda, marafonshylar men gýmanoıd robottar qaýipsizdik maqsatyndaǵy oqshaýlaý sharalary qoldanyla otyryp, bir trassada qatar jarysty. Bul bastama gýmanoıd robot tehnologııasyn qalalyq ortada synaqtan ótkizýge jáne tájirıbelik turǵyda qoldanýdy damytýǵa baǵyttalǵan.
Eske sala keteıik, robottar arasyndaǵy jartylaı marafon birinshi ret 2025 jylǵy 19 sáýirde ótti jáne ol gýmanoıd robottardyń alǵashqy álemdik jartylaı marafony retinde tarıhqa endi.
