Gýmanıtarlyq jáne saıası daǵdarys ahýaldaryna EQYU-nyń tıimdi is-qımyldar jasaýy máselesi basty nazarda bolady –S. Zılberman
ASTANA. 28 qarasha. QazAqparat /Rýslan Ǵabbasov/ - Azamattyq qoǵammen ózara baılanys tetikterin bekitý óte mańyzdy. Bul týraly búgin Astanadaǵy EQYU-nyń Azamattyq qoǵam konferentsııasynda Azamattyq qatysý boıynsha dúnıejúzilik alıans ókili Sonıa Zılberman aıtty.
«Konferentsııa aıasynda biz gýmanıtarlyq jáne saıası daǵdarys ahýaldaryna EQYU-nyń tıimdi is-qımyldar jasaýy máselesin talqylaıtyn bolamyz. Máselen, bıylǵy jyly Qyrǵyzstanda osyndaı jaǵdaı týyndaǵan bolatyn jáne atalǵan eldegi sekildi bundaı qaıshylyqtarǵa jol berilmeýi tıis. Biz ótken tájirıbeni zerdeleı otyryp, bolashaqqa usynystar ázirlep, tájirıbe jınaqtaımyz»,-dedi S. Zılberman.
Atap aıtqanda basqosý barysynda Taýly Qarabaq óńirindegi ahýal boıynsha túıtkildi másele talqylanady, sondaı-aq bul problemany retteýdegi taraptardyń pikiri tyńdalmaq. Munymen qosa, Qyrǵyzstandaǵy másele de konferentsııaǵa qatysýshylardyń nazarynan tys qalmaıdy.
Onyń sózine qaraǵanda, azamattyq qoǵammen ózara qarym-qatynas sharalary, adam quqyǵy, saılaý kezindegi baqylaý úderisi, lańkestikpen kúres máseleleri turǵysynda baıandamalar jasalmaq.
«Búgingi konferentsııada beıbitshilik pen adam quqyǵyn qorǵaý jolynda eńbek etýge bel býǵan adamdar men sarapshylar jınalyp otyr. Osy oraıda aldaǵy alqaly jıynnyń qarsańynda mańyzdy usynystar bolady degen senimdemin»,-dedi S. Zılberman.
