Gýmanıtarlyq kómek: Semeıden Aıagózge júk kóligi attandy
«NurOtan» partııasynyń qalalyq fılıalynan qurylǵan qaıyrymdylyq qoryna jınalǵan azyq-túlik pen kıim-keshekter salynǵan júk kóligi Aıagózge attandy. Sý tasqynynan zardap shekkenderge janashyrlyq tanytqan jurt qoldan keler kómekterin aıamaǵan. Jergilikti bılik ókilderi men túrli mekeme basshylarynan ózge qarapaıym turǵyndar da qoldarynan kelgenshe kómek kórsetýge tyrysqan. «NurOtan» partııasynyń qalalyq fılıaly tóraǵasynyń birinshi orynbasary Zýlfııa Jamaltdınovanyń aıtýynsha, bul kómek kórsetýdiń sońy emes, búgingi kúnge deıin de zardap shekken jerlesterimizge kómek jóneltilgen.
«Biz jerlesterimizdiń jaǵdaıyna beı-jaı qaraı almaımyz. Tótenshe jaǵdaı jarııalanǵan kúnnen bastap qolymyzdan kelgenshe kómek kórsetip jatyrmyz. Búgin mine taǵy kómek jiberip otyrmyz. Un, kartop, maı, makaron ónimderi jáne ózge de azyq-túlikter men kıimderdi óz qajetterine jaratyp, jumyla kótergen júktiń jeńil ekenin sezinse deımiz. Biz qoldaý kórsetken barsha qalalyqtarǵa alǵys bildiremiz», - dedi Zýlfııa Jamaltdınova.
Aıta ketý kerek, arnaıy ashylǵan esep-shotqa da qarjylaı kómek berip jatqandar kóp. Mysaly, Semeı qalalyq máslıhatynyń depýtattary Ásetqan Dosqujanov pen Qaırat Mırashev árqaısysy 100 myń teńge, al Janat Moldaǵalıeva 50 myń teńge aýdarypty. Sondaı-aq, Semeı medtsına ýnıversıtetiniń jáne «QTJ» UK» AQ Semeı jol bólimshesi fılıalynyń qyzmetkerleri bir kúndik jalaqylaryn aýdarǵan.