Gýmanıtarlyq júk tıelgen 190-nan astam júk kóligi Gaza sektoryna jetti
ASTANA. KAZINFORM – 21 mamyrda soǵys júrip jatqan Gaza sektoryna gýmanıtarlyq kómek, onyń ishinde un, balalar taǵamy men medıtsınalyq qural-jabdyqtar tıelgen taǵy 100 júk kóligi jetti. Bul týraly Izraıldiń COGAT úkimettik uıymy málimdedi, dep habarlaıdy DW aqparat agenttigi.
- Barlyq kómek muqııat qaýipsizdik tekserisinen keıin tapsyryldy. Bul Izraıl qorǵanys armııasynyń laýazymdy tulǵalarynyń usynysy boıynsha jáne saıası basshylyqtyń dırektıvasyna sáıkes jasaldy. Biz Gaza sektoryna gýmanıtarlyq kómek kórsetýdi jalǵastyramyz, bul kómek HAMAS lańkestik uıymynyń qolyna túspeýi úshin bar kúsh-jigerimizdi salamyz, - delingen COGAT jazbasynda.
Bir kún buryn Gaza sektoryna osyndaı gýmanıtarlyq júk tıelgen 93 júk kóligi kelgeni atap ótildi.
Gýmanıtarlyq kómek Izraıl, Mysyr jáne Gaza sektory shekaralarynyń túıisken jerindegi Kerem-Shalom baqylaý-ótkizý beketine keldi. Munda gýmanıtarlyq qyzmetkerler ony keıinnen jergilikti turǵyndar arasynda taratý úshin júk kólikterine salyp jiberýi kerek. Dúnıejúzilik azyq-túlik baǵdarlamasy (WFP) ókildiginiń basshysy Antýan Renar 78 júk kóligi «óz saǵatyn kútip turǵanyn» habarlady.
- Biz júkterimizdiń tonalmaıtynyna kóz jetkizýimiz kerek, - dedi ol Associated Press agenttigine.
Buǵan deıin tonaý kómek jetkizýge kedergi keltirgen.
Izraıl Gaza turǵyndaryna kómek HAMAS-tyń jetkizilimderdi ıemdenýine jol bermeý úshin qaýipsiz taratý aımaqtary qurylǵannan keıin qaıta bastalatynyn málimdedi. Alaıda, bul mehanızm shamamen tek 25 mamyrda jumys isteı bastaıdy, dep habarlady buǵan deıin Izraıl premer-mınıstri Bınıamın Netanıahýdyń halyqaralyq ister jónindegi keńesshisi Kerolaın Glık.
Buǵan deıin Izraıl qaıtadan Gaza sektoryna gýmanıtarlyq kómek jetkizýge ruqsat bergenin jazǵan bolatynbyz.