Gýmanıtarlyq dıplomatııa — shekaradan tys adamdardy biriktiretin qýatty kúsh — Aıda Balaeva
ASTANA. KAZINFORM — Mádenıet jáne aqparat mınıstri Aıda Balaeva Ortalyq Azııa elderi men Qytaı arasyndaǵy mádenı-gýmanıtarlyq qarym-qatynastyń mańyzyna toqtaldy.
— Shyǵys pen Batysty, Soltústik pen Ońtústikti bir arnaǵa toǵystyratyn ıdeıalar men bastamalarǵa toly Astana qalasyna qosh keldińizder. Qazir Ortalyq Azııa elderi men Qytaı Halyq Respýblıkasy arasyndaǵy barlyq baǵytta, onyń ishinde mádenı-gýmanıtarlyq yntymaqtastyqtyń qarqyndy damýyn baıqap otyrmyz. QHR tóraǵasy Sı Tszınpın ilgeriletip otyrǵan «Bir beldeý — bir jol» bastamasy aıasynda mádenıet erekshe orynǵa ıe. Bul joba tek aýqymdy ınfraqurylymdyq bastama ǵana emes, eń aldymen halyqtardyń júregin jaqyndastyratyn kópir. Gýmanıtarlyq almasýlar, birlesken mádenı bastamalar men medıa yntymaqtastyq — senim men ashyq dıalog keńistigin qalyptastyrady. Óıtkeni, medıa mádenıetti nasıhattaýda jáne halyqtardy jaqyndastyratyn gýmanıtarlyq jobalardy jarııalaýda asa mańyzdy ról atqarady. Sondyqtan búgingi forýmǵa buqaralyq aqparat quraldarynyń basshylary jınalyp otyr, — dedi Aıda Balaeva elordada ótip jatqan «Tatý kórshi jáne dostyq: bolashaqqa qadam Qytaı-Ortalyq Azııa gýmanıtarlyq almasý» atty forýmda.
Mınıstrdiń málimdeýinshe, mádenıet aralyq baılanys ulttar arasyndaǵy dostyqty nyǵaıtyp, yntymaqtastyqtyń, onyń ishinde aqparat jáne tsıfrlyq kommýnıkatsııalar salasynyń kókjıegin keńeıtedi.
— QHR Tóraǵasy Sı Tszınpın aıtqandaı: «Órkenıetter bir-birinen úırenip, birin-biri tolyqtyryp, adamzattyń damýyna birlese yqpal etýi tıis». Búginde, buryn-sońdy bolmaǵandaı, mádenı almasý ózara túsinistikti tereńdetýge, júrekterdi ashýǵa jáne álem taǵdyryna ortaqtastyq sezimin qalyptastyrýǵa jol ashady. Gýmanıtarlyq dıplomatııa — bul memleketter shekarasynan tys adamdardy biriktiretin qýatty kúsh. Búgingi forým elderimiz úshin mańyzdy oqıǵa jáne medıa men mádenı-gýmanıtarlyq yntymaqtastyq salasyndaǵy birlesken jumystyń jańa tásilderi men ortaq qaǵıdattaryn ázirleýge jol ashady dep senemin, — deıdi mınıstr.
Elordada «Tatý kórshi jáne dostyq: bolashaqqa qadam Qytaı-Ortalyq Azııa gýmanıtarlyq almasý» atty forým ótip jatyr.
Eske sala ketsek, bıyl mamyrda Astanada «Ortalyq Azııa — Qytaı» medıaforýmy ótken edi.
Aıta keteıik, búgin Astanada ótken «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmy aıasynda Qazaqstan men Qytaı 25 mlrd dollarǵa 60 kelisimge qol qoıdy.