Gúljan Qaraǵusova: Qazaqstandyq vagondardyń ózindik quny Reseıdegiden joǵary
ASTANA. QazAqparat - QR Parlamenti Májilisiniń depýtaty Gúljan Qaraǵusova «Tulpar-Talgo» zaýytynda óndiriletin vagondardyń ózindik qunyn tómendetý kerektigin atap ótti, dep habarlaıdy «QazAqparat» HAA tilshisi.
«Bıylǵy jyldy «Tulpar-Talgo» halyqaralyq talaptarǵa saı sertıfıkatty alýmen bastap otyr. Bir ǵana aıta keterligi - bizdiń vagondardyń Reseıden qaraǵanda ózindik quny joǵary. Bizdiń kelesi mindetimiz: vagondardyń ózindik qunyn tómendetý. Reseı de bul naryqta monopolıst bolǵysy keledi. Biraq, bizdiń vagondar Reseı tarapynyń ózinen sertıfıkatqa ıe bolyp otyrǵandyqtan, biz de bul baǵytta básekeles bola alamyz», - deıdi májilismen «Tulpar-Talgo» zaýynyń jumysymen tanysý barysynda.
Májilis depýtaty óz sózinde vagondardy óndirýde qazaqstandyq ónimniń úlesi artyp kele jatqandyǵy qýantatynyn aıtady.
«Ózindik qunnyń tómendeýi - básekege qabilettiligimizdi arttyryp, búgingi kúnniń ózinde otandyq vagondarǵa qyzyǵýshylyq tanytyp otyrǵan eksporttaýshylarmen kelissóz júrgizilip jatyr. Al ázirge biz tek ishki naryqty ǵana qamtamasyz etip otyrmyz», - deıdi ol.
Gúljan Qaraǵusova sonymen qatar, depýattar turaqty túrde eńbek ujymdarymen kezdesý ótkizip otyratynyn tilge tıek etti.
«Parlament ótken jyldaǵydaı jumys retin eńbek ujymdarymen, halyqpen kezdesý arqyly bastaıdy. Sebebi, bizge sessııanyń ekinshi bóligin de alǵashqydaı sátti ótkizýdiń mańyzy zor. Bizge Úkimetpen birlese otyryp, qaı baǵytta jumysty kúsheıtý kerektigine taldaý júrgizý qajet», - deıdi depýtat.
