Gúlshara Ábdiqalyqova zııaly qaýym ókilderi jáne ardagerlermen kezdesti
Jıynǵa oblystyq ardagerler keńesiniń tóraǵasy Serik Dúısenbaev, qoǵam qaıratkeri, medıtsına salasynyń ardageri Turǵanbaı Mahanov, memleket jáne qoǵam qaıratkeri Bıǵalı Qaıýpov shaqyryldy.
Aldymen aımaq basshysy ardagerler qaı kezde de urpaqtar sabastyǵyn berik ornatýda parasattylyq tanytyp, qoǵamdyq ómirdiń jandanýyna erekshe úles qosyp kele jatqanyn atap ótti.
Aldaǵy kezeńde atqarylatyn jumystardy saralaý jáne ortaq máselelerdi birlesip talqylaý baǵytynda oı bólisti.
«Elimiz óziniń jańa tarıhyndaǵy eń kúrdeli sátterdi ótkerýde. Qańtardyń alǵashqy kúnderinde tutastyǵymyz ben eldigimizge nuqsan keltirýge baǵyttalǵan is-qımyldar kórinis berdi. Memleket basshysynyń jedel ári batyl sheshimderiniń arqasynda halqymyz syn saǵattan aman ótti. Prezıdent 11 qańtarda Parlament Májilisiniń jalpy otyrysynda táýelsiz memleketimizdi odan ári damytýdyń jańa mindetterin belgilep, elimizde tarıhı ózgerister kezeńi bastalǵanyn málimdedi. Basty maqsat - kúsh-jigerimizdi biriktirip bar qıyndyqtardy eńserý jáne qýatty Jańa Qazaqstandy qurý. Sondyqtan aldaǵy josparlardy birlese júzege asyrsaq degen oıymyz bar», - dedi Gúlshara Ábdiqalyqova.
Basqosýda Turǵanbaı Mahanov sońǵy kezderi aqsaqaldar men jastar arasyndaǵy sabaqtastyqtyń ajyrap ketkenin aıtyp, ulttyq qundylyqtardy dáripteýde Aqsaqaldar keńesi men Jastar ortalyǵynyń birlesken jumystaryn jandandyrý qajettigin qaperge saldy.
Sondaı-aq, dinı turǵyda baǵytynan adasyp júrgen jastarǵa rýhanı tálim-tárbıe berý isine de jete mán berý kerektigin atap ótti.
Al, oblystyq ardagerler keńesiniń tóraǵasy Serik Dúısenbaev jastardyń oı-sanasyna áser etetin túrli aqparattarǵa tosqaýyl qoıyp, birlikke úndeıtin tanymdyq basqosýlardy arttyrý qajet degen usynysyn ortaǵa saldy.
Kezdesýde ardager Bıǵalı Qaıýpov tehnologııalyq ózgerister qoǵamynda ómir súretin jastarmen ashyq dıskýssııa ornatý qajettigin jáne naqty áreketterge negizdelgen «Jańa Qazaqstan» bastamasyna qoldaý bildirýde barlyq býynnyń daıyn bolýy tıis ekenin eske saldy.
Memleket basshysy aıqyndaǵan mindetterdi oryndaýda bilimdi, parasaty bıik azamattardy tartý qajettiligine toqtaldy.
Jıyn sońynda oblys ákimi ortaq máselelerdi birlesip sheshýde árbir usynys eskeriletinin jáne zııaly qaýym ókilderin Prezıdent ustanymyna qoldaý bildirýge shaqyrdy.
