Gúlshara Ábdiqalyqova jataqhana týraly: Jeke oqý oryndary kóbirek belsendi
NUR-SULTAN. QazAqparat - Stýdenttik jataqhana qurylysynyń jobasyna memlekettik JOO-lardan góri jeke oqý oryndary belsene atsalysyp jatyr. Bul týraly búgin Úkimet otyrysynda Premer-Mınıstrdiń orynbasary Gúlshara Ábdiqalyqova málim etti, dep habarlaıdy QazAqparat tilshisi.
«Bilim jáne ǵylym mınıstri atap ótkendeı, jumys ústinde 43 shart bar. Onyń 20-na qol qoıylyp, 23-i qorytyndy kezeńde tur. Osy sharttarmen bıyl 9196 oryndy qoldanysqa engizý josparlanýda. Qazirdiń ózinde naqty nátıjeler bar», - dedi Úkimet otyrysynda Gúlshara Ábdiqalyqova.
Onyń aıtýynsha, stýdentterdiń eń kóbi Almaty qalasynda shoǵyrlanǵanyn eskere otyryp, 26 sáýirde Almaty ákimdigimen birge barlyq rektorlardyń qatysýymen jeke keńes ótkizilgen.
«Almaty qalasy baǵdarlama iske qosylǵannan bastap jeke ınvestıtsııalardy tartý jolymen jobany iske asyrýdyń oń úlgisin, sondaı-aq joǵary bilim salasynda jeke sektordyń kóptep qatysýyn kórsetip otyr. 6100 orynǵa arnalǵan 10 sharttyń biri ǵana memlekettik JOO-men jasalǵan. Bizdiń uzaq merzimdi mindetimiz - atqarýshy organdardyń kúsh- jigeri negizinde bilim berý mekemeleriniń basshylarymen jáne bıznes qaýymdastyqpen birlese otyryp, jataqhanalarmen ýaqtyly jáne sapaly qamtamasyz etý. Biz stýdentterdiń jaıly turmysy úshin qolaıly jaǵdaı jasaý kerektigin jete túsinemiz», - dedi ol.
Gúlshara Ábdiqalyqova óz sózinde jeke oqý oryndarynyń jobalardy is júzinde júzege asyrýǵa belsene atsalysyp jatqanyn atap ótti.
«Al memlekettik JOO-lar bul jumysty endi ǵana qolǵa alyp otyr. Taǵy bir mańyzdy másele - áleýetti ınvestorlarǵa usynylatyn tetikter, artyqshylyqtar týraly aqparattyń júıeli bolýy. Onyń ishinde 7 paıyzdyq sýbsıdııalaý men qosymsha sharalarǵa erekshe ekpin berý bolyp sanalady. Sondyqtan, BǴM JOO-larmen, ákimdiktermen birge jumystardy júrgizýi tıis. Birinshiden, 42 shartqa sáıkes, nysandardyń merziminde qoldanysqa berilýin qamtamasyz etse, ekinshi - bıznestiń qatysýǵa múddeli bolýyn arttyrý sharalaryn qabyldaý kerek», - dedi Gúlshara Ábdiqalyqova.
Eske sala ketsek, búgingi Úkimet otyrysynda Bilim jáne ǵylym mınıstri Kúlásh Shámshıdınova jataqhana qurylysy boıynsha jospardy oryndaý úshin Úkimetke birqatar shara usynǵan bolatyn.
