Gúlshara Ábdiqalyqova Jańaózende kópbalaly otbasylardyń úıine bardy
Gúlshara Ábdiqalyqova Janarys tigin fabrıkasynyń ujymymen kezdesti. Onda 340-tan astam adam jumys isteıdi, olardyń 95% - áıelder. Kásiporynda munaı jáne basqa da salalar úshin arnaıy kıimder tigiledi. Mekeme basshysynyń aıtýynsha, fabrıkadaǵy eńbekaqy 136 myń teńgeden joǵary.
«Áleýmettik qamqorlyq» memlekettik baǵdarlamasy aıasynda Premer-Mınıstrdiń orynbasary men Eńbek jáne halyqty áleýmettik qorǵaý mınıstri árqaısysy 6 baladan tárbıelep otyrǵan kópbalaly jáne az qamtylǵan 4 otbasynyń úıine bardy.
Kópbalaly ana Jadyra Narymbaeva alty bala tárbıelep otyr. «Kúmis alqamen» marapattalǵan. Biraq uzaq ýaqyt jumys taba almaǵan. Ol jaqynda poshta taratýshy jumysyna ornalasqan.
Nurbıke Egizbaeva da «Kúmis alqa» ıesi. Ol mektepte jumys isteıdi. Joldasyn «Ózen Invest» kompanııasyna turaqty jumysqa ornalastyrýǵa kómekteskeni úshin bılik ókilderine alǵys bildirdi.
Kezdesý barysynda Gúlshara Ábdiqalyqova memleket tarapynan kórsetiletin jańa áleýmettik qoldaý sharalaryn, olardy iske asyrýdyń maqsattary men tetikterin egjeı-tegjeıli túsindirdi. Sonymen qatar kópbalaly analarǵa ataýly áleýmettik jáne turǵyn úı kómegin alý erejeleri týraly aıtty.
Búgingi tańda Mańǵystaýda eń tómengi kúnkóris deńgeıi - 33 928 teńge. Eń tómengi kúnkóris deńgeıiniń 70% - 23 749 teńgeni quraıdy. Dál osyndaı somany ataýly áleýmettik kómek alýǵa quqyly kópbalaly, az qamtylǵan otbasylar aı saıyn bir balaǵa alatyn bolady. Jalpy, Mańǵystaý oblysynda mundaı kómek 14 211 adamǵa, Jańaózende 3 myń adamǵa kórsetilmek.
Sonymen qatar, oblysta ataýly áleýmettik kómek alatyn az qamtylǵan kópbalaly otbasylarǵa 100 myń teńge kóleminde birjolǵy kómek kórsetý týraly sheshim qabyldandy.
Jumys kúniniń sońynda Gúlshara Ábdiqalyqova men Berdibek Saparbaev halyqty jumyspen qamtý ortalyǵynda boldy. Bul jerde olarǵa Jańaózen qalasynda jyl sońyna deıin 5260 jańa jumys orny ashylatyny aıtyldy
