Gúlshara Ábdiqalyqova Taraz qalasyndaǵy az qamtylǵan otbasylarǵa bardy
NUR-SULTAN. QazAqparat - Búgin tústen keıin QR Premer-Mınıstriniń orynbasary Gúlshara Ábdiqalyqovanyń jetekshiligimen Úkimettik jumys toby Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý maqsatynda Jambyl oblysyna bardy. Bul týraly primeminister.kz saıtynda habarlady.
Jumys tobynyń quramynda eńbek jáne halyqty áleýmettik qorǵaý vıtse-mınıstri E. Jylqybaev, densaýlyq saqtaý vıtse-mınıstri L. Aqtaeva, Qurylys jáne turǵyn úı-kommýnaldyq sharýashylyq isteri komıtetiniń tóraǵasy M. Jaıymbetov boldy.
Jumys sapasynyń birinshi pýnkti Taraz qalasyndaǵy az qamtylǵan otbasylar boldy. Máselen, zeınetker jubaıymen mektep jasyndaǵy alty balany tárbıelep otyrǵan kóp balaly ana A. Naýatovaǵa jańa formattaǵy ataýly áleýmettik kómektiń belgilenýi týraly túsindirildi. 1 sáýirden bastap AÁK qaıta esepteledi, endi olar 144 myń 600 teńge alatyn bolady.
Premer-Mınıstrdiń orynbasary eńbek jáne halyqty áleýmettik qorǵaý vıtse-mınıstrimen birge Halyqqa qyzmet kórsetý ortalyǵynyń jumysyn tekserdi, munda 621 memlekettik qyzmet kórsetiledi. Bıylǵy jyldyń 1 toqsanynda azamattarǵa 20 myńnan astam qyzmet kórsetilgen.
Sonymen qatar Úkimettik jumys tobynyń músheleri Taraz qalasyndaǵy Jumyspen qamtý ortalyǵynyń qyzmetimen tanysyp, AÁK belgileý algorıtmin qarastyrdy. 2018 jyly 12 myńnan astam adam túrli qyzmetter alǵan. Jalpy oblys boıynsha 2019 jyldyń qańtar-aqpan aılarynda belsendi jumyspen qamtý sharalarymen qamtý 5999 adamdy qurady. 1903 turaqty jumys orny quryldy, aqy tólenetin qoǵamdyq jumystarǵa 2277 adam tartyldy.
Sapar sońynda Gúlshara Ábdiqalyqova azamattardy jeke qabyldady. Atap aıtqanda, Baızaq aýdanynan Álı Qoshtaı bıznes ashý úshin nesıe alýda kómek berý ótinishin jetkizdi. Ol Ónimdi jumys pen jappaı kásipkerlikti damytýdyń «Eńbek» memlekettik baǵdarlamasynyń ekinshi baǵyty (jappaı kásipkerlikti damytý) boıynsha oqytylyp, sertıfıkat alǵan. Onyń máselesi oń sheshildi, vıtse-premer óńir basshylyǵyna naqty tapsyrma berdi.
Bul ýaqytta jumys tobynyń basqa músheleri oblystaǵy túrli uıymdarǵa bardy. Máselen, densaýlyq saqtaý vıtse-mınıstri L. Aqtaeva Jýaly aýdanyn, Qurylys jáne turǵyn úı-kommýnaldyq sharýashylyq isteri komıtetiniń tóraǵasy M. Jaıymbetov Taraz qalasyndaǵy energetıka, qurylys jáne TKSh nysandaryn aralady. Olar emhanalarǵa, aýrýhanalarǵa, qurylys alańdaryna, energetıka jáne turǵyn úı-kommýnaldyq sharýashylyq nysandarynda bolyp, densaýlyq saqtaý salasynyń qyzmetkerlerimen, qurylysshylarmen, sonymen qatar aýyl turǵyndarymen kezdesti.
Budan ózge, olar eńbek ujymdarynyń ókilderimen kezdesýler ótkizilip, áleýmettik-eńbek salasy máseleleri boıynsha naqty túsinikter berdi.
Jambyl oblysyna jumys sapary jalǵasady.
