Gúlshara Ábdiqalyqova Taraz qalasyna jumys saparymen bardy
Memlekettik hatshy Qazaqstandaǵy Ózbekstan jyly aıasynda ótken is- sharalarǵa qatysty.
Jıynǵa, sondaı-aq, Jambyl oblysynyń ákimi A.Myrzahmetov, Ózbekstan Áıelder komıteti tóraıymynyń orynbasary M.Nýrmatova, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, memlekettik organdar jáne qalyń jurtshylyq ókilderi qatysty.
Sharada jurt aldynda sóz sóılegen Gúlshara Ábdiqalyqova Elbasy Nursultan Nazarbaevtyń: «Ulttyq salt-dástúrimiz, tilimiz ben mýzykamyz, ádebıetimiz, toı-joralǵylarymyz, bir sózben aıtqanda, ulttyq rýhymyz boıymyzda máńgi qalýǵa tıis», - degen sózine basa nazar aýdardy.
Іs-sharalar aıasynda «Atameken» óńirlik kásipkerler palatasynyń (ÓKP) Іsker áıelder keńesi jáne «Qazaqstannyń isker áıelderi qaýymdastyǵy» respýblıkalyq qoǵamdyq birlestigi (RQB) ókilderiniń Ózbekstannan kelgen áriptesterimen kezdesýleri ótti. Sonymen birge Jambyl oblysy men Ózbekstan arasyndaǵy týrıstik qyzmet kórsetý salasyn damytýdaǵy yntymaqtastyq pen týrızmdi uıymdastyrý isin jetildirý jóninde kelisimge qol jetkizildi.
Sapar barysynda Memlekettik hatshy M.H.Dýlatı atyndaǵy Taraz memlekettik ýnıversıtetiniń 60 jyldyǵyna arnalǵan is-sharalarǵa da qatysty. Búgingi tańda ýnıversıtette 685 professor jáne oqytýshy qyzmet etedi, 12 myńnan astam stýdent bilim alyp jatyr. 14 oqý-zerthana keshenderi jáne zamanaýı qural-jabdyqtarmen qamtamasyz etilgen 155 zerthana - solardyń ıgiliginde.
Gúlshara Ábdiqalyqova oqytýshylar men stýdentterdi Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn belsendi júzege asyrýǵa shaqyrdy. Sondaı-aq, Memlekettik hatshy saltanatty túrde «Ýnıversıtet shejiresi» monýmentin, zamanaýı sport keshenin ashyp, stýdentterge arnalǵan 500 oryndyq jataqhana qurylysynyń alǵashqy kirpishin qalaý rásimine qatysty.
