Gúlshara Ábdiqalyqova: Sońǵy kúnderde koronavırýs juqtyrǵandar qatarynda zeınetkerler kóp

QYZYLORDA. QazAqparat - Qyzylorda oblysynda karantınge baılanysty shekteýlerdi jeńildetýdiń bes kezeńi ótkizildi. Oblys ákimi Gúlshara Ábdiqalyqova ergilikti «Qyzylorda» telearnasynyń tikeleı efırinde jeńildetýden keıin jaǵdaı kúrdelene túskenine nazar aýdardy, dep habarlaıdy QazAqparat tilshisi.

Syr óńirinde de shekteýlerdi jeńildetýdiń bes kezeńi ótkizildi. Kóptegen salanyń qyzmeti qalpyna kele bastady. Alaıda, jeńildetýden keıin jaǵdaı kúrdelenýde. Qazir oblysta indet juqtyrǵan 297 naýqas bar.

«Ótken aptada 51 jaǵdaı tirkelip, aptalyq ósim 20,4 paıyzdy qurady. Ásirese, zeınet jasyndaǵy adamdar jıi anyqtalýda. Alǵashqy bir jarym aıda zeınet jasyndaǵy 18 adam tirkelip, 1-eýi aýyr jaǵdaıda boldy. Sońǵy eki aptada osy toptaǵy 12 naýqas tirkeldi. Olardyń 4-eýi aýyr, 1-eýi óte aýyr jaǵdaıda em alýda.

Bul málimetter bárimizdi oılandyrýy tıis. Sondyqtan, úlkenderimizdi qorǵaıyq. 65-ten asqan aǵa-apalarymyzdan úıde bolyp, oqshaýlanýdy suraımyz», - dedi oblys ákimi.

Aımaq basshysynyń aıtýynsha, indettiń taralýy ujymdastar arasynda, otbasylyq is-sharalardan jáne kóptiń jınalýynan baıqalýda. Sońǵy kezdegi naýqastardyń kóbisiniń qaıdan juqtyrǵanyn anyqtaý qıynǵa túsýde.

«Kez kelgen adamnan juǵý yqtımaldyǵy joǵary. Qazirgi karantındi jeńildetý kezinde ózara qarym-qatynas artýda. Turǵyndar arasynda indetke senbeýshilik jáne beıqamdyq kúsheıýde. Osyǵan sáıkes sanıtarlyq-epıdemıologııalyq talaptardy saqtaýǵa degen ynta tómendedi. Sondyqtan oblys turǵyndaryn kúndelikti ómirde saqtyq sharalaryn qatań ustanýǵa shaqyramyn. Qoǵamdyq ortada, kópshilik oryndarda betperde taǵyp júrý, áleýmettik araqashyqtyqty saqtaý qalypty jaǵdaıǵa aınalýy tıis», - dedi oblys ákimi Sońǵy derek boıynsha Qyzylorda oblysynda koronavırýs ınfektsııasyn juqtyrǵan 8 adam tirkeldi.