Gúlshara Ábdiqalyqova Ózbekstandaǵy kásipker áıelder forýmyna qatysty
TAShKENT. QazAqparat - 2018 jylǵy 13 qyrkúıekte QR Memlekettik hatshysy G.N.Ábdiqalyqova jumys saparymen Ózbekstan Respýblıkasyna bardy, dep habarlaıdy QazAqparat.
Memlekettik hatshy sapar aıasynda ÓR Premer-mınıstriniń orynbasary, Áıelder komıtetiniń tóraıymy T.Narbaevanyń shaqyrýymen Qazaqstan jáne Ózbekstan áıelderiniń bıznes-forýmyna qatysty.
Oǵan, sondaı-aq, QR Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııa músheleri, Parlament depýtattary, memlekettik organdar, «Atameken» UKP, úkimettik emes uıymdar, kásipker áıelder qoǵamdastyǵy ókilderi qatysty.
Quttyqtaý sózinde Gúlshara Ábdiqalyqova El Prezıdenti N.Á.Nazarbaev Qazaqstan men Ózbekstan arasyndaǵy ekijaqty qarym-qatynastyń damýyna aıryqsha kóńil bóletinin atap ótti.
Memhatshy Memleket basshysynyń «Bizdiń eki halyqtyń qarym-qatynasynyń naǵyz baýyrlastyq sıpaty óz tamyryn sonaý ǵasyrlar qoınaýyna tartyp, ata-babalarymyzdyń dańqty ortaq tarıhy men baı rýhanı murasy arqyly bekip jatqany» jónindegi sózine kóńil aýdartty.
G.Ábdiqalyqova Qazaqstanda áıelderdiń ekonomıkalyq múmkindikterin keńeıtýge baǵyttalǵan memlekettik saıasat júrgizilip otyrǵanyn aıtty.
«Demokratııalyq qoǵam qurýdyń negizgi baǵytynyń biri - genderlik úılesimge qol jetkizý. Táýelsizdik jyldarynda aıtarlyqtaı jetistikterge jettik. Biz áıelderdiń saıasatqa aralasýy jóninen ornyqty ilgerileýshilikke qol jetkizdik. Májiliste 29 áıel bar, ıaǵnı olar depýtattardyń jalpy sanynyń 27%-ynan asady. Ekonomıkada qarqyndy túrde kásipker áıelder sektory qalyptasty. Shaǵyn jáne orta bıznes sýbektileriniń 44%-yn áıelder basqarady, olar bul saladaǵy barlyq jumys ornynyń úshten birin qamtamasyz etip otyr», - dedi Memhatshy.
Forýmda QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men Ózbekstan áıelderi komıteti arasyndaǵy yntymaqtastyq týraly memorandýmǵa qol qoıyldy, Qazaqstan men Ózbekstannyń kásipker áıelderiniń ınnovatsııalyq bıznes-jobalary nazarǵa usynyldy, syndarly túrde ozyq tájirıbe almasý júzege asyryldy.
QR Memlekettik hatshysy G.N.Ábdiqalyqova forým aıasynda ÓR Premer-mınıstriniń orynbasary, Áıelder komıtetiniń tóraıymy T.K.Narbaevamen birge áıelder bıznes qoǵamdastyǵy yntymaqtastyǵynyń, sondaı-aq áıelderdiń rólin arttyrý men múmkindikterin keńeıtýdiń ózekti máselelerin talqylady.
