Gúlshara Ábdiqalyqova orman sharýashylyǵy salasyndaǵy qyzmetkerlerdi marapattady
Búgin oblys ákimi Gúlshara Ábdiqalyqova «Orman sharýashylyǵy qyzmetkerleri kúni» kásibı merekesine oraı aımaqtaǵy birqatar sala ardagerleri men qyzmetkerlerin quttyqtady. Aımaq basshysy oblystyń ekologııalyq jaǵdaıyn jaqsartýda orman sharýashylyǵynyń qyzmeti erekshe ekindigin atap ótti.
«Qazaqstannyń shóldi aımaǵynda ornalasqan bizdiń óńir úshin orman sharýashylyǵynyń óz orny bar. Tynys-tirshiligimiz úshin mańyzy zor salany nyǵaıtýda sizder bilikti de bilimdi, isker de qabiletti maman retinde ózgelerge úlgi-ónege bolyp, oblysymyzdyń áleýmettik-ekonomıkalyq jáne orman sharýashylyǵy salalarynyń damýyna ólsheýsiz úles qosyp kelesizder. «Atadan mal qalǵansha, tal qalsyn» deıdi danalarymyz. Olaı bolsa, Syr eliniń tabıǵatyn saýyqtyrý, ormandy saqtaý, qorǵaý men molyqtyrýǵa ári qaraı da aıanbaı eńbek ete beretinderińizge senim bildirip, qıyndyǵy men qyzyǵy qatar júrgen eńbekterińizge tolaǵaı tabys, shańyraqtaryńyzǵa shattyq, qut-bereke tileımin, - dedi aımaq basshysy G.Ábdiqalyqova.
Kezdesýde aımaqtyń ekologııalyq ahýalyn jaqsartyp, orman alqaptarynyń artýyna úles qosqan sala ardagerleri Muhıdın Ismaılov, Saqtaǵan Eshmahanovqa «Qurmet» gramotasy, ardager Qadısha Álimbetova jáne sala mamandary Sabıt Sadyqov, Gaýhar Jýmabaeva, Bahytjan Álimjanov, Aıbolat Berekeshov, Erbolsyn Úsenbaev, Erjan Júnisov, Temirbaı Sarymbaev, Jánibek Sarybaevqa oblys ákiminiń «Alǵys haty» tabystaldy.
Sharada sóz alǵan sala ardagerleri Muhıdın Ismaılov, Saqtaǵan Eshmahanov jáne Qadısha Álimbetova sońǵy jyldary orman sharýashylyǵyna memleketten qoldaýdyń artqanyn aıtyp ótti. Osynyń arqasynda Syr óńirinde aýqymdy jumystar atqarylyp, sekseýil alqaptarynyń óskenin jetkizdi. Kásibı merekede ormanshylardy quttyqtap, qurmet kórsetken oblys ákimine rızashylyǵyn bildirdi.
Aıta keteıik, oblys aýmaǵyndaǵy 24 mln gektar jerdiń 6,5 mln gektaryn memlekettik orman qory quraıdy.
